MOK-un təsis etdiyi “İdman Filmləri və Proqramları Milli Televiziya Festivalı”nın münsiflər heyətinin mətbuat konfransı keçirilib

Olimpizm xəbərləri

10.01.2024, 12:30

Yanvarın 10-da Milli Olimpiya Komitəsinin (MOK) inzibati binasında MOK-un təsis etdiyi “İdman Filmləri və Proqramları Milli Televiziya Festivalı” ilə bağlı münsiflər heyətinin təqdimatı və mətbuat konfransı keçirilib. Milli Olimpiya Komitəsində təşkil olunan tədbirdə əvvəlcə festivalın rəsmi tanıtım çarxı təqdim olunub. Festivalın baş prodüseri Avrasiya Televiziya və Radio Akademiyasının akademiki Arzu Qulamov öz çıxışında festivala tərəfdaş qismində qoşulan ictimai və media qurumlarına təşəkkür edərək, festivalda 5 nominasiya üzrə qiymətləndirmə aparılacağını bildirib. O, deyib ki, ilk festivala böyük maraq olmuşdu. "Ötən festivala 70 layihə təqdim edilmişdi. İlk seçimlərdən sonra 4 nominasiya üzrə 40 layihə festivalın gündəliyinə salınmışdı. Hər nominasiya üzrə qaliblər mükafatlandırılmışdı. İkinci festivalda qaliblərin seçimində yenilik etməyi düşünürük. Qaliblər “Oskar” sistemi ilə müəyyənləşəcək. Biz iki nominasiyanı qadın idmançılarına həsr etmişik. Bunlar “Zərif qəhrəman”, uşaq və yeniyetmələrlə bağlı “Gələcəyin qalibləri” nominasiyasıdır. Əsas məqsədimiz televiziya kanalları və idman federasiyaları ilə sıx əməkdaşlıq qurmaq, onların təqim etdiyi məhsulları ictimaiyyətə çatdırmaqdır. Artıq layihələri qəbul etməyə başlamışıq. Bu günə qədər festivala 15 yaradıcılıq işi təqdim edilib", - deyə Arzu Qulamov bildirib. Sonra festivalın münsiflər heyətinin üzvləri - Sidney-2000 Yay Olimpiya Oyunlarının çempionu, Milli Olimpiya Komitəsinin vitse-prezidenti Zemfira Meftaxetdinova (sədr), Azərbaycan Kinematoqrafçılar İttifaqının katibi, rejissor, ssenarist Oleq Səfərəliyev, “Vətən” Uşaq Yaradıcılıq Mərkəzinin təsisçisi Zəhra Quliyeva, “Bakılı oğlanlar” komandasının üzvü, rejissor və prodüser Ənvər Mansurov, Əməkdar jurnalist Xanlar Məmmədov KİV nümayəndələrinə təqdim olunub. Mətbuat konfransında Milli Olimpiya Komitəsinin vitse-prezidenti, “İdman Filmləri və Proqramları Milli Televiziya Festivalı”nın Təşkilat Komitəsinin sədri Çingiz Hüseynzadə də iştirak edib. “İdman Filmləri və Proqramları Milli Televiziya Festivalı”nın münsiflər heyətinin sədri Zemfira Meftaxetdinova çıxış edərək, bu layihənin ölkəmizdə idmanın inkişafına, Olimpiya Hərəkatının təbliğinə böyük töhvələr verəcəyini bildirib. O, qadın idmanına da budəfəki layihədə yer ayrılmasının sevindirici hal olduğunu diqqətə çatdırıb. Münsiflər heyətinin digər nümayəndələri Oleq Səfərəliyev, Ənvər Mansurov və Zəhra Quliyeva çıxış edərək festivalın uğurlu olacağına inandıqlarını bildiriblər. Münsiflər heyətinin çıxışlarından sonra KİV nümayəndələrinin sualları cavanlandırılıb. Mətbuat konfransında bildirilib ki, ölkəmizdə idmanın və incəsənətin inkişafında əməyi olan tanınmış şəxslərdən ibarət münsiflər heyəti festival çərçivəsində müəyyən olunmuş nominasiyalar üzrə 1-ci yerə layiq olan 3 namizəd işləri seçib, qalibləri müəyyən edəcək. Eyni zamanda, festivalın rəsmi internet səhifəsində tamaşaçı səsverməsi aparılacaq və onun nəticələri əsasında, ən çox müsbət rəy almış layihə də qiymətləndiriləcək. Mart ayında təntənəli bağlanış mərasimi keçiriləcək. Qaliblərə mükafatlar, bütün iştirakçılara və laureatlara diplomlar təqdim olunacaq. Məlumat üçün bildirək ki, müsabiqəyə qoşulmaq istəyən müəlliflər və təşkilatlar müəllif hüququları onlara aid olan filmləri, proqramları, reklam çarxları və musiqili kliplərini festivalın Təşkilat Komitəsinin ünvanına DVD, flaşkart formasında təqdim etməli və ya digər faylların ötürülməsi üçün istifadə olunan resurslar vasitəsilə festivalın rəsmi elektron poçt ünvanına göndərilməlidir. Festivala materiallar 31.01.2024-cü il tarixinədək qəbul olunur. Daha ətraflı məlumatı isə http://millitvfest.az/, https://www.facebook.com/millitvfest.az/. sayt və sosial media hesablarından da əldə etmək olar. MOK-un təsis etdiyi “İdman Filmləri və Proqramları Milli Televiziya Festivalı”nın tərəfdaşı “Cüdo Klub 2012” İctimai Birliyi, informasiya tərəfdaşları isə AZTV, МИР, İdman TV, CBC Sport, ARB, İTV və Space televiziya kanalları, "olympic.az”, "olimpnews.az”, "Trend”, "milli.az”, "day.az”, "azernews.az”, "idmanvəbiz”, "turkicworld” portalları, "Olimpiya dünyası” qəzeti və "Sportsman” jurnalıdır.