"Judo Club 2012"nin cüdoçuları uğurlarını davam etdirirlər

$\"Judo Club 2012\"nin cüdoçuları uğurlarını davam etdirirlər$

Olimpizm xəbərləri

25.07.2024, 12:03

İyulun 24-də Sağan Olimpiya İdman Kompleksində kişilər arasında ACF turunun üçüncü turniri keçirilib.

"Judo Club 2012"dən verilən məlumata görə, Azərbaycan Cüdo Federasiyasının təşkilatçılığı ilə kişilər arasında keçirilən yarışda 100-ə yaxın cüdoçu 7 çəki dərəcəsində qüvvəsini sınayıb. Turnirdə mükafatçılar sırasında "Judo Club 2012"nin cüdoçuları da yer alıblar. Belə ki, klubun yetirmələrindən Hüseyn Allahyarov -60 kq çəki dərəcəsində bütün rəqiblərinə qalib gələrək fəxri kürsünün ən yüksək pilləsinə qalxıb. Klubun digər təmsilçisi Vidad Əliyev isə -100 kq çəki dərəcəsində bürünc medala sahib çıxıb. Qeyd edək ki, yarışın keçirilməsində əsas məqsəd kişi cüdoçular arasında rəqabət səviyyəsinin yüksəldilməsi, yarış təcrübəsinin artırılması, eyni zamanda istedadlı idmançıların aşkar olunması və milli komandaya cəlb edilməsidir. Bu yarışlar nəticəsində formalaşacaq reytinq siyahısında ilk yeri tutan idmançılar həmçinin beynəlxalq turnirlərdə iştirak hüququ qazanacaqlar.