Firuddin Qurbanovun 80 illik yubileyi qeyd olunub

Olimpiya dünyası

Bugün, 18:30

Oktyabrın 22-də Azərbaycan İdman Akademiyasının akt zalında güləş üzrə SSRİ çempionu, beynəlxalq dərəcəli idman ustası, Əməkdar məşqçi və "Əməkdar bədən tərbiyəsi və idman xadimi" Firuddin Qurbanovun 80 illik yubileyinə həsr olunmuş tədbir keçirilib.

Olimpnews.az xəbər verir ki, tədbirdə Milli Olimpiya Komitəsinin (MOK) vitse-prezidenti Çingiz Hüseynzadə, gənclər və idman naziri Fərid Qayıbov, Azərbaycan İdman Akademiyasının rektoru Fuad Hacıyev, Suraxanı rayon İcra Hakimiyyətinin başçısı Adil Əliyev, İdman Veteranları İctimai Birliyinin sədri Zemfira Meftaxetdinova, Olimpiya çempionları, idman ictimaiyyətinin nümayəndələri və veteran idmançılar iştirak ediblər.

Azərbaycan Respublikasının Dövlət Himni səsləndirildikdən sonra Firuddin Qurbanovun şərəfli ömür yolundan və idman fəaliyyətindən bəhs edən videoçarx nümayiş olunub.

Tədbirdə çıxış edən gənclər və idman naziri Fərid Qayıbov Firuddin Qurbanovun zəngin təcrübəsinin gənc idmançıların yetişməsində mühüm rol oynadığını bildirib. Nazir ölkəmizdə Firuddin Qurbanova möhkəm cansağlığı arzulayıb, veteran idmançıların gənc nəslə nümunə olduğunu qeyd edib.

Milli Olimpiya Komitəsinin vitse-prezidenti Çingiz Hüseynzadə Firuddin Qurbanovun Azərbaycan güləşinin inkişafındakı xidmətlərindən, zəngin idman karyerasından və məşqçilik fəaliyyətindən danışıb. O, ömrünün böyük hissəsini idmana həsr edən yubilyarın qazandığı uğurlarla Azərbaycan idmanının tarixində özünəməxsus yer tutduğunu qeyd edib. Çingiz Hüseynzadə Firuddin Qurbanovun 1971, 1972 və 1974-cü illərdə SSRİ çempionu adını qazandığını, SSRİ xalqlarının V Yay Spartakiadasının qalibi olduğunu xatırladaraq, bu uğuru yüksək qiymətləndirib.

Çıxışı zamanı yubilyarla bağlı xatirələrini bölüşən Çingiz Hüseynzadə Firuddin Qurbanovu təbrik edib, ona möhkəm cansağlığı arzulayıb.

Azərbaycan İdman Akademiyasının rektoru Fuad Hacıyev yubilyarı təbrik edərək, onun vaxtilə Akademiyanın tələbəsi olduğunu və qazandığı uğurların ali təhsil müəssisəsinin tarixində xüsusi yer tutduğunu vurğulayıb. O, Firuddin Qurbanovun idman sahəsindəki səmərəli fəaliyyətini, peşəkar məşqçilik xidmətlərini və Qərbi Azərbaycan idman məktəbinin layiqli nümayəndəsi kimi keçdiyi nümunəvi həyat yolunun əhəmiyyətini xüsusi qeyd edib.

Suraxanı rayon İcra Hakimiyyətinin başçısı Adil Əliyev Firuddin Qurbanovun SSRİ yığma komandasının üzvü, dəfələrlə SSRİ çempionu və Azərbaycan idmanının tanınmış nümayəndələrindən biri kimi xidmətlərini diqqətə çatdırıb. O, yubilyarın idmançı və məşqçi kimi fəaliyyətinin, milli komandaya verdiyi töhfələrin Azərbaycan idmanının inkişafında mühüm rol oynadığını vurğulayıb.

MOK-un vitse-prezidenti, İdman Veteranları İctimai Birliyinin sədri Zemfira Meftaxetdinova çıxışında idman veteranlarına göstərilən maddi və mənəvi dəstəyə görə minnətdarlığını bildirərək, bu cür görüşlərin onların sevincinə və birliyinə töhfə verdiyini qeyd edib. O, veteran idmançıların, xüsusilə Firuddin müəllimin gənc nəslin vətənpərvərlik ruhunda tərbiyəsində və gələcək idmançıların yetişməsində mühüm nümunə olduğunu deyib.

Azərbaycan Güləş Federasiyasının Güləş İrsi və İcması Komitəsinin sədri Elçin Cəfərov federasiya adından çıxış edərək Firuddin Qurbanovun Azərbaycan idman ictimaiyyəti, xüsusilə güləş idman növü üçün nümunəvi şəxsiyyət olduğunu vurğulayıb. O qeyd edib ki, yubilyar SSRİ dövründə dəfələrlə ittifaq çempionu olub, SSRİ Xalqlarının Spartakiadasının qalibi adını qazanıb və Azərbaycanın ilk beynəlxalq dərəcəli idman ustası kimi tarixə düşüb. Elçin Cəfərov onun SSRİ yığma komandasının üzvü kimi uğurlar qazandığını, məşqçi kimi isə Azərbaycan yığmasına rəhbərlik etdiyini və Avropa, dünya çempionatlarının mükafatçılarını yetişdirdiyini bildirib.

Tədbirdə çıxış edən yubilyarın dostları və idman veteranları Əhməddin Rəcəbli, Rafiq Hacıyev, Tofiq Eyvazov yubilyarla bağlı xatrirələrini bölüşərək Firuddin Qurbanovun çoxillik fəaliyyəti, idmançı və məşqçi kimi qazandığı uğurlar, eləcə də gənc nəslin yetişdirilməsindəki rolu barədə danışıblar.

Sonda çıxış edən Firuddin Qurbanov mərasimin təşkilatçılarına və iştirakçılara minnətdarlığını bildirib. O, əlamətdar günündə ona göstərilən diqqət və ehtirama görə minnətdarlığını ifadə edərək, bu xoş münasibətin onun üçün xüsusi məna daşıdığını vurğulayıb.

Tədbirin sonunda xatirə şəkli çəkdirilib.