Azərbaycan İdman Veteranları İctimai Birliyi 2025-ci ilin yekun tədbirini keçirib

Olimpizm xəbərləri

24.12.2025, 16:38

Dekabrın 24-də Azərbaycan İdman Akademiyasının (AİA) akt zalında Azərbaycan İdman Veteranları İctimai Birliyinin 2025-ci il üzrə yekun hesabat tədbiri keçirilib.

Olimpnews.az xəbər verir ki, tədbirdə Milli Olimpiya Komitəsinin vitse-prezidentləri Çingiz Hüseynzadə, Fərid Mansurov, MOK-un baş katibi Azər Əliyev, gənclər və idman naziri Fərid Qayıbov, Azərbaycan İdman Veteranları İctimai Birliyinin sədri, Olimpiya çempionu Zemfira Meftaxedinova, Azərbaycan İdman Akademiyasının rektoru Fuad Hacıyev, millət vəkili Könül Nurullayeva, MOK-un İcraiyyə Komitəsinin üzvləri, Olimpiya çempionları, idman veteranları və idman ictimaiyyətinin nümayəndələri iştirak ediblər. İctimai Birliyin ilin yekunlarına həsr olunmuş hesabat tədbirində gənclər və idman naziri Fərid Qayıbov çıxış edərək, idman veteranlarının Azərbaycan idmanının formalaşmasında və inkişafında xüsusi rol oynadığını bildirib. Nazir vurğulayıb ki, bu dəyərli irsin qorunması və veteranların təcrübəsinin gənc idmançılara ötürülməsi dövlətin idman siyasətinin əsas prioritetlərindəndir. Milli Olimpiya Komitəsinin vitse-prezidenti Çingiz Hüseynzadə Azərbaycan idmanının fəxri sayılan idman veteranlarını il ərzində qazanılan nailiyyətlər, qarşıdan gələn Dünya Azərbaycanlılarının Həmrəlik günü və Yeni il münasibəti ilə təbrik edib. Vitse-prezident bildirib ki, ölkə idmanının ən böyük uğurlarından biri məhz zəngin təcrübəyə və nümunəvi həyat yoluna malik idman veteranlarının olmasıdır. Çıxışında Azərbaycan İdman Veteranları İctimai Birliyinin fəaliyyətinə də toxunan Çingiz Hüseynzadə Zemfira Meftaxetdinovanın sədr seçilməsindən sonra qurumun fəaliyyətində ciddi inkişaf və canlanma müşahidə olunduğunu vurğulayıb. MOK-un vitse-prezidenti qeyd edib ki, Azərbaycan idmanının gələcək inkişafı baxımından idman veteranlarının yubileylərinin keçirilməsi, onların zəngin təcrübəsinin gənc nəslə aşılanması və gənclərin bu cür tədbirlərdə fəal iştirakının təmin edilməsi mühüm əhəmiyyət kəsb edir. Azərbaycan İdman Veteranları İctimai Birliyinin sədri, Olimpiya çempionu Zemfira Meftaxetdinova isə çıxışında qeyd edib ki, rəhbəri olduğu qurum qısa zaman ərzində böyük uğurlar əldə edib. O, qeyd edib ki, idman veteranlarının təcrübə və məsləhətlərinə hər zaman böyük ehtiyac duyulur. Qurum rəhbəri onu da diqqətə çatdırıb ki, Azərbaycan İdman Veteranları İctimai Birliyi növbəti illərdə də daha böyük layihələr və tədbirlər keçirməyi qarşıya məqsəd qoyub.

Millət vəkili Könül Nurullayeva çıxışında Azərbaycan idmanının qazandığı nailiyyətlərdən söz açaraq qeyd edib ki, dövlət başçısı cənab İlham Əliyevin idman sahəsinə göstərdiyi diqqət və qayğısı nəticəsində Azərbaycan dünyada idman ölkəsi kimi tanınır. Cənab Prezidentin hər zaman idmançıların və idman ictiamiyyətinin nümayəndələrini diqqətdə saxladığını vurğulayan Könül Nurullayeva idman veteranlarının da bu qayğıdan kənarda qalmadıqlarını deyib. İlin son hesabat tədbirində iştirak edən digər idman rəsmiləri öz çıxışlarında qurumun fəaliyyətini yüksək qiymətləndirib və bu işdə idman veteranlarına uğurlar arzulayıblar. Tədbirdə çıxışlar başa çatdıqdan sonra Azərbaycan İdman Veteranları İctimai Birliyi il ərzində fərqlənən federasiyalara və idman veteranlarına təşəkkürnamə və fəxri fərman təqdim edib.