“Xatirələrdə yaşayanlar” veteran idmançılar guşəsi keçmişlə gələcək arasında mənəvi körpü rolunu oynayacaq

Olimpiya dünyası

24.06.2026, 18:00

Azərbaycan idman tarixinin qorunması, tanınmış idmançıların həyat və fəaliyyətinin gələcək nəsillərə çatdırılması mühüm vəzifələrdən biridir. Bu baxımdan “Xatirələrdə yaşayanlar” veteran idmançılar guşəsinin yaradılması xüsusi əhəmiyyət daşıyır. Həmin guşənin formalaşdırılmasında Prezidentin fərdi təqaüdçüsü, pedaqogika üzrə elmlər doktoru, professor Dilqəm Quliyevin xidmətləri də danılmazdır.

Azərbaycan Yazıçılar Birliyinin üzvü, Azərbaycan Olimpiya Akademiyasının “Kütləvi İdman” bölməsinin sədri, Azərbaycan Milli Ensiklopediyasının bədən tərbiyəsi və idman bölməsi məqalələrinin müəllifi, pedaqogika üzrə elmlər doktoru, professor Dilqəm Quliyev uzun illər Azərbaycan idmanının tarixi, inkişaf mərhələləri və görkəmli idman xadimlərinin fəaliyyətinin araşdırılması ilə məşğul olmuşdur. Onun əsas tədqiqat istiqamətlərində

Azərbaycanda bədən tərbiyəsi və idmanın inkişaf tarixi, Olimpiya hərəkatı, idman təhsili və pedaqogikası, müstəqillik dövründə Azərbaycan idmanının inkişaf mərhələləri xüsusi qeyd olunmalıdır. Azərbaycanda bədən tərbiyəsi və idman sahəsində ilk və yeganə müdafiə etmiş elmlər doktoru dissertasiyası “Azərbaycan Respublikasında müstəqillik dövründə bədən tərbiyəsi və idmanın inkişafi istiqamətləri (1991-2015-ci illər)” mövzusuna həsr edilib..

Dilqəm Quliyev ölkədə idmanşünaslıq və idman pedaqogikası üzrə aparıcı tədqiqatçılardan biri hesab olunur.

O, Azərbaycan İdman Akademiyasında 55 ilə yaxın elmi-pedaqoji fəaliyyət göstərməklə yanaşı, idman tarixinin öyrənilməsi və təbliği istiqamətində də mühüm işlər həyata keçirmişdir. Müəllifi olduğu 500-ə yaxın əsərlər, kitablar, monoqrafiyalar, dərsliklər və elmi məqalələr Azərbaycan idmanının salnaməsini yaratmağa xidmət edir.

“Xatirələrdə yaşayanlar” guşəsinin yaradılmasında əsas məqsəd Azərbaycan idmanının inkişafında xidmətləri olmuş veteran idmançıların həyat yolunu, qazandıqları uğurları və cəmiyyət qarşısındakı xidmətlərini yaşatmaqdır. Professor Dilqəm Quliyev bu təşəbbüs vasitəsilə veteran idmançıların zəngin təcrübəsinin unudulmamasına, onların gənc nəslə nümunə kimi təqdim edilməsinə çalışmışdır. Onun fəaliyyətində idman tarixinin qorunması, vətənpərvərlik hisslərinin aşılanması və milli dəyərlərin təbliği mühüm yer tutur. Bu guşənin gələcəkdə gənc nəslə verəcəyi töhfələr olduqca əhəmiyyətlidir. İlk növbədə gənclər Azərbaycan idmanının keçdiyi inkişaf yolunu öyrənəcək, tanınmış idmançıların zəhməti, əzmkarlığı və vətənə bağlılığı haqqında məlumat əldə edəcəklər. Bundan əlavə, veteran idmançıların həyat hekayələri gənclərdə vətənpərvərlik, milli qürur, mübarizlik və sağlam həyat tərzinə maraq kimi keyfiyyətlərin formalaşmasına kömək edəcəkdir.

Bu guşə keçmişlə gələcək arasında mənəvi körpü rolunu oynayaraq idman ənənələrinin davamlılığını təmin edəcəkdir.