“Gələcəyə Doğru 2026” turniri keçirilib

Olimpiya dünyası

25.06.2026, 20:20

Azərbaycan Üzgüçülük Federasiyasının (ASF) təşkilatçılığı ilə Bakı Su İdmanı Sarayında suya tullanma üzrə “Gələcəyə Doğru 2026” turniri keçirilib.

Olimpnews.az Azərbaycan Üzgüçülük Federasiyasının mətbuat xidmətinə istinadən xəbər verir ki, gərgin və maraqlı mübarizə şəraitində keçən yarışda ümumilikdə 23 idmançı 7 kateqoriya üzrə çıxış edib. Turnirin əsas məqsədi ölkəmizdə suya tullanma idman növünə marağın artırılması, kütləviliyin genişləndirilməsi və perspektivli idmançıların üzə çıxarılması olub.

Yarışın nəticələrinə əsasən, başlanğıc qrupunda 1 metr hündürlükdən tullanma yarışlarında oğlanlar arasında Tamerlan Əliverdiyev birinci, Murad İsmayılzadə ikinci, Timur Kardaş isə üçüncü yeri tutub. Qızların mübarizəsində Aişə Xəlil qalib olub, Aleksiya Səmədova gümüş, Mila Samofal isə bürünc medala sahib çıxıb.

10 və daha kiçik yaşlı oğlanların 1 metrlik tramplindən suya tullanma yarışında Muhəmməd Hüseynov qızıl medal qazanıb. Əkrəm Əhmədov ikinci, Əkrəm İsmayılzadə isə üçüncü yeri tutub. Eyni yaş qrupunda qızlar arasında Mehri Ağayeva fəxri kürsünün ən yüksək pilləsinə yüksəlib. Sofiya Ağayeva ikinci, Məryəm Beqova isə üçüncü olub.

10 yaşadək oğlanların 3 metrlik tramplindən yarışında da Muhəmməd Hüseynov qalib adını qazanıb, Əkrəm Əhmədov isə ikinci yeri tutub. Qızların eyni növ üzrə mübarizəsində Mehri Ağayeva qızıl, Sofiya Ağayeva gümüş, Məryəm Beqova isə bürünc medal əldə edib.

11 və daha böyük yaşlı qızların 1 metrlik tramplindən suya tullanma yarışında Ayla Hüseynova birinci, Alisa Hacıyeva ikinci, Suada Tahir isə üçüncü olub. 11 və daha böyük yaşlı oğlanların 3 metrlik tramplindən yarışında Tahir Maqsudlu birinci yeri tutub. Bu yaş qrupunda qızların 3 metrlik tramplindən suya tullanma yarışında Ayla Hüseynova qalib gəlib, Alisa Hacıyeva ikinci, Suada Tahir isə üçüncü yerdə qərarlaşıb.

Platformadan tullanma yarışlarında isə 11 və daha böyük yaşlı oğlanlar arasında Maqsud Tahirli fəxri kürsünün ən yüksək pilləsinə yüksəlib.

Yarışın sonunda fərqlənən idmançılar Azərbaycan Üzgüçülük Federasiyası tərəfindən medal, diplom və sertifikatlarla mükafatlandırılıblar.