İyulun 2-də Polşanın Krakov şəhərində keçirilən III Avropa Oyunlarına yekun vurulub. 48 ölkədən 7 minə yaxın idmançının mübarizə apardığı yarışda atletlər idmanın 29 növü üzrə 253 dəst medal uğrunda yarışıblar. Oyunlarda Azərbaycan idmançıları da təmsil olunublar. Polşaya 14 (atletika da daxil) idman növü üzrə 101 idmançı ilə yollanan Azərbaycan komandası Oyunları ümumilikdə 11 (3 qızıl, 2 gümüş, 6 bürünc) medalla başa vurub. İdmançılarımız Krakov-2023-də medalları 5 idman növündə - karate (2 qızıl, 1 bürünc), kikboksinq (1 qızıl), taekvondo (1 gümüş, 1 bürünc), boks (1 gümüş, 1 bürünc), muay-tay (3 bürünc) əldə ediblər.

Komandamızın heyətində qızıl medallara karateçilərimiz Tural Ağalarzadə (67 kq), İrina Zaretska (68 kq) və kikboksçumuz Fərid Ağamoğlanov (63,5 kq) layiq görülüb. Taekvondoçumuz Səyyad Dadaşov (54 kq) və boksçumuz Məhəmməd Abdullayev (+92 kq) isə gümüş medala sahib çıxıb. III Avropa Oyunlarının bürünc medllarını isə komandamıza karateçimiz Asiman Qurbanlı (+84 kq), taekvondoçumuz Qaşım Maqomedov (58 kq), boksçumuz Murad Allahverdiyev (80 kq) və muay-tayçılarımız Xəyal Əliyev (67 kq, Emili Rzayeva (63,5 kq), Aysu Devrişova (57 kq) qazandırıb.

Komandamız bu nəticə ilə ümumi medal sıralamasında 24-cü yeri tutub. Rusiya komandasının iştirak etmədiyi III Avropa Oyunlarında birinci pillənin sahibi 100 (35 qızıl, 26 gümüş, 39 bürünc) medalla İtaliya millisi olub. Beləliklə, Bakı-2015 və Minsk-2019-dan sonra Avropa Oyunlarının qalibi adını fərqli komanda qazanıb. Qeyd edək ki, əvvəlki yarışlarda Rusiya komandası birinciliyi əldə etmişdi. Krakov-2023-də ikinci yerdə İspaniya 57 (21 qızıl, 17 gümüş, 19 bürünc), üçüncü yerdə isə Ukrayna 41 (21 qızıl, 12 gümüş, 8 bürünc) komandası qərarlaşıb. Almaniya 63 (20 qızıl, 16 gümüş, 27 bürünc) və Fransa 62 (17 qızıl, 19 gümüş, 26 bürünc) isə müvafiq olaraq, 4-5-ci yerləri tutub.

Oyunlarda ümumilikdə 840 medal sahibini tapıb. Bunların 254-ü qızıl, 253-ü gümüş, 333-ü bürüncdür. Krakov-2023-də 48 ölkədən 41-i medal qazanıb ki, onlardan da 35-i çempionluq sevinci yaşayıb.

Qeyd edək ki, tarixdə ilk Avropa Oyunları 2015-ci ildə Bakıda, ikinci multiidman tədbiri isə 2019-cu ildə Minskdə keçirilib. Azərbaycan millisi Bakı-2015-də 56 (21 qızıl, 15 gümüş, 20 bürünc) medal qazanaraq ümumi medal sıralamasında ikinci yeri tutub. Minsk-2019-da isə komandamız 28 (5 qızıl, 10 gümüş, 13 bürünc) medal qazanaraq medal sıralamasında 10-cu olub.