Hacı Əliyev: “Qismətimdə çempion olmaq varsa, bu, Parisdə gerçəkləşəcək”- MÜSAHİBƏ

BOK

11.06.2024, 15:08

Macarıstanın paytaxtı Budapeştdə təşkil olunan güləş üzrə reytinq turniri pəhləvanlarımız üçün 5 medalla yadda qaldı. Paris-2024 Yay Olimpiya Oyunları ərəfəsində keçirilən yarışda sərbəst güləş üzrə yığmamızın üzvü Hacı Əliyev də mükafatçılar sırasında yer aldı. Reytinq turnirini bürünc medalla başa vuran pəhləvanımız Milli Olimpiya Komitəsinin saytı “Olympic.az”, “Olimpiya dünyası” qəzeti və “olimpnews.az” saytına müsahibə verib. Müsahibimiz reytinq turnirindəki çıxışı və Paris Olimpiadasına hazırlıq prosesi barədə danışıb. Həmin müsahibəni oxuculara təqdim edirik.

- Hacı, istərdik söhbətimizə reytinq turnirindəki çıxışınla başlayaq. Paris-2024 ərəfəsi Macarıstanda təşkil edilən yarışda bürünc medal qazandın. Çıxışını necə xarakterizə edərdin?

- Bu yarış bizim üçün Paris-2024-dən əvvəl son yoxlama turniri idi. Burada məqsəd çempion olmaq deyildi. Əsas məqsədim olimpiadadan əvvəl reytinq yarışında iştirak edərək, Olimpiya Oyunlarının ab-havasını yaşamaq və özümü yoxlamaq idi. Bir gün ərzində beş görüş keçirdim. Bu da mənim üçün çox effektli idi. Çünki Olimpiya Oyunları ərəfəsində bir gün ərzində neçə görüş keçirə biləcəyimi yoxladım. Yarışda çempion olan yaponiyalı idmançıya birinci görüşdə qalib gəlmişdim. Düşünürəm ki, turnirı gözəl keçdi.

- Olimpiya Oyunlarına hazırlıq prosesi necə gedir? İstərdik bir qədər yarışlara hazırlıq planı barədə danışasan.

- Olimpiadaya hazırlıq prosesi çox yaxşı keçir. Ardıcıl olaraq təlim-məşq toplanışlarında iştirak edirik. Bizim Göygöldə və Qubada təlim-məşq toplanışlarımız olacaq. Olimpiya Oyunlarına qədər məşqlərimiz davam edəcək. Azərbaycan Güləş Federasiyasının və məşqçilərimizin sayəsində hər şey gözəl şəkildə planlaşdırılıb.

- Azarkeşlər ikiqat Olimpiya mükafatçımız Hacı Əliyevdən Parisdə hansı nəticəni gözləyə bilərlər?

- Sözsüz ki, azarkeşlər məndən Olimpiya çempionluğunu gözləyir. Mən də dördilliyin zirvə yarışının qalibi olmağı çox istəyirəm. Bu yaşıma qədər idmanda qalmağımın səbəbi də məhz bu istəkdir. Paris-2024-də əsas məqsədim Olimpiya çempionu olmaqdır. Bu titula sahib çıxmaq üçün həqiqətən də nə lazımdırsa edirəm. Amma düşünürəm ki, bu, Allahın qismətidir. Əgər qismətimdə çempion olmaq varsa, bu, inşallah Parisdə gerçəkləşəcək. İstərdim azarkeşlər bilsin ki, Olimpiya Oyunlarının hər medalı dəyərlidir. Buna qədər Rio-2016-nın bürünc, Tokio-2020-nin isə gümüş medalını qazanmışam. Üçüncü dəfə olimpiadada medal qazansam, bu, mənim üçün tarixi bir nəticə olacaq.

- Paris-2024-də əsas rəqiblərin kimlərdir?

- Bildiyiniz kimi, Olimpiya Oyunlarında ən güclü rəqabət 65 kq və 74 kq çəki dərəcələrində olacaq. Çünki burada həqiqətən də hər bir rəqib çempion olmağa iddialıdır. Mənim üçün 65 kq çəki dərəcəsində ən güclü rəqiblər Yaponiya, Macarıstan və İran idmançılarıdır. Eləcə də monqolustanlı və rusiyalı güləşçilər də əsas rəqiblərdən sayılırlar. Həqiqətən də güclü rəqiblər və güclü rəqabət olacaq.

- Komanda yoldaşlarından hansı nəticəni gözləyirsən?

- Sözsüz ki, Paris-2024-də komanda yoldaşlarımdan gözəl qələbələr gözləyirəm. Bütün çəki dərəcələrində iştirak edən güləşçilərimiz medal qazanmağa layiq idmançılardır. Çalışsalar, hər biri Parisdə medal əldə edə bilərlər. Düşünürəm ki, bu şansdan yetərincə və düzgün şəkildə istifadə etmək lazımdır. Hazırda komanda yoldaşlarım arasında Parisə yollanacaq heyətdə heç bir güləşçi Olimpiya medalı qazanmayıb. İstərdim ki, onlar öz kolleksiyalarına Olimpiya medalını da əlavə etsinlər.

- Əvvəlki müsahibələrində bildirmişdin ki, bu, sənin üçün sonuncu olimpiada olacaq. Karyeranı başa vurduqdan sonra hansı işlə məşğul olacaqsan?

- Bəli, nə qədər də üzücü olsa da bu, mənim sonuncu yarışım olacaq. Peşəkar idmanla vidalaşmaq sözsüz ki, çətindir. Düşünəndə ki, o, hissləri, o həyəcanı bir daha yaşamayacağam, bu, məni çox üzür. Amma hər şeyin öz vaxtı var. Hər şey öz vaxtında bitəndə daha gözəl olur. Uzun illərdir ki, güləşirəm. Bu yaşa qədər yüksək formada güləşmək asan deyil. Bu illər ərzində qələbələr və titullar qazanmışam. Əlbəttə “karyeramı başa vururam” - sözünü demək mənim üçün çətin olsa da, hər şeyə son deməyi bacarmaq lazımdır. Hazırda Dövlət Sərhəd Xidmətində çalışıram. Fərqi yoxdur, ya idman, ya da başqa sahədə çalışmağımdan asılı olmayaraq, gələcəkdə də ölkəmiz üçün əlimdən gələni etməyə hazıram.

Azər Əlizadə

Dİgər xəbərlər

09.05.2026, 22:35

Qadın güləşi üzrə komandamız Rioda 4-cü oldu

09.05.2026, 21:10

Olimpiadanın son günündə daha 4 idmançımız yarışacaq

18.02.2026, 16:19

Trek xəttinə tərəf qaçan it fotofinişə düşüb - FOTO

18.02.2026, 10:08

Milan-Kortina-2026: Bu gün sonuncu təmsilçimiz olimpiadada mübarizəyə başlayır

17.02.2026, 17:41

Burgerdən zəhərlənən idmançıların vəziyyəti yaxşılaşıb

17.02.2026, 17:08

Ana və oğul Qış Olimpidasının tarixinə düşdülər

17.02.2026, 16:30

Norveçli xizəkçi uğursuz çıxışdan sonra meşəyə girdi

17.02.2026, 14:35

Azarkeşlər Qrenlandiya bayraqlarını yarışa gətiriblər

17.02.2026, 13:51

Ölkəsinə və özünə ilk Olimpiya çempionluğunu qazandırdı

16.02.2026, 18:36

Milan-Kortina-2026: Norveç liderliyini davam etdirir

16.02.2026, 14:44

19 yaşlı hokkeyçi olimpiadada tarixi nəticə əldə edib

16.02.2026, 14:10

Daha bir idmançı yıxılaraq ciddi zədə alıb

SON XƏBƏRLƏR

BÜTÜN XƏBƏRLƏR