Milano Kortina 2026 Qış Olimpiya və Paralimpiya Oyunlarının medalları təqdim olundu

Olimpizm xəbərləri

16.07.2025, 11:52

İyulun 15-də Milano Kortina 2026 Qış Olimpiya və Paralimpiya Oyunlarının medalları ictimaiyyətə təqdim olunub. Olimpnews.az xəbər verir ki, Venesiyada keçirilən təqdimat mərasimi olimpiyaçı Milano Kortina 2026-nın səfir proqramının rəhbəri Valentina Markeinin aparıcılığı ilə baş tutub. Tədbirdə iki idman əfsanəsi – Olimpiya mükafatçısı Federika Pelleqrini və 15 qat Paralimpiya medalçısı Françeska Porçellato da iştirak edərək medalları qayıqla Santa Lüçiya stansiyasından Kanal Qrandedəki tarixi Palazzo Balbiyə gətiriblər. Milano Kortina 2026-nın dizayn komandası tərəfindən hazırlanmış medallar idmançıların əzmkarlığını və Olimpiya ruhunu simvolizə edir. Medalların istehsalı zamanı yalnız təkrar emal olunmuş metaldan istifadə olunacaq, onlar bərpa olunan enerji ilə işləyən induksiya sobalarında əridiləcək və ekoloji cəhətdən təmiz qablaşdırma ilə təqdim olunacaq. İtaliya Dövlət Zərbxanasının rəhbəri Paolo Perronenin sözlərinə görə, hər medal dizayn və texnologiyanın vəhdətini əks etdirən unikal sənət əsəridir: “Bu medallar zəhmətin, qələbənin və birliyin simvoludur.” Medalların dizaynı həm iki şəhərin - Milanla Kortinanın, həm də idmanda birlik və dəstəyin rəmzinə çevrilib. İkiqat Olimpiya bürünc medalçısı Alessia Maurelli isə medalın simvolik dəyərinə toxunaraq bildirib: “O, sadəcə metal deyil. O, xəyalların, səbirin və ümidin sübutudur”. Fransalı biatlon əfsanəsi Martin Fourkade isə medal dizaynlarının unudulmaz olduğunu qeyd edib: “Onları sadəcə simvol kimi yox, vizual olaraq da sevməliyik. Bu, idmançılar üçün əhəmiyyətlidir”. Qeyd edək ki, Milano Kortina 2026 Qış Olimpiya Oyunları fevralın 6-dan 22-dək keçiriləcək.