BOK Rusiya Olimpiya Komitəsi ilə bağlı qərarını yumşaldıb

Olimpizm xəbərləri

Bugün, 20:37

Beynəlxalq Olimpiya Komitəsi (BOK) Rusiya Olimpiya Komitəsinə tətbiq olunan sanksiyalarla bağlı yeni qərar qəbul edib.

Olimpnews.az xəbər verir ki, təşkilatın İcraiyyə Komitəsi 2023-cü il oktyabrın 12-dən qüvvədə olan statusun dayandırılması qərarını müvəqqəti olaraq aradan qaldırıb. Qərar təşkilatın hüquq komissiyasının apardığı hüquqi qiymətləndirmənin nəticələrinə əsasən verilib.

Bildirilib ki, Rusiya Olimpiya Komitəsi artıq Ukrayna Milli Olimpiya Komitəsinin səlahiyyət dairəsinə aid olan ərazilərdə fəaliyyət göstərən regional idman qurumlarını öz strukturunda saxlamır. Həmçinin Rusiya tərəfi gələcəkdə də həmin ərazilərdə heç bir fəaliyyət həyata keçirməyəcəyinə dair təminat verib.

Bu dəyişiklikdən sonra, antidopinq qaydaları istisna olmaqla, Rusiya idmançıları və komandalarına tətbiq edilən əvvəlki məhdudiyyətlər qüvvədən düşür. Bununla belə, onlar Beynəlxalq Test Agentliyinin nəzarətində olan milli antidopinq proqramına cəlb edilməli və yarışlarda iştirak hüququ əldə etməzdən əvvəl müəyyən olunmuş sayda dopinq yoxlamasından keçməlidirlər.

BOK eyni zamanda bəyan edib ki, yaxın dövrdə öz himayəsi altında keçirilən yarışların Rusiyada təşkili nəzərdə tutulmur. Bundan başqa, Rusiya hökumətini və dövlət qurumlarının nümayəndələrini təşkilatın tədbirlərinə dəvət etməyəcək. Rusiya bayrağı, dövlət himni və digər milli rəmzlərin Olimpiya Oyunlarında istifadəsinə dair yekun qərarın isə sonrakı mərhələdə veriləcəyi qeyd olunub.

BOK əlavə edib ki, Ukrayna ilə bağlı mövqeyində heç bir dəyişiklik yoxdur və təşkilat bundan sonra da Ukrayna Olimpiya Hərəkatına dəstəyini davam etdirəcək.