Azərbaycanın 6 sərbəst güləşçisi xalça üzərinə çıxacaq

Güləş

01.08.2026, 09:55

Milli Gimnastika Arenasında keçirilən güləş üzrə U-17 dünya çempionatı davam edir.

Olimpnews.az xəbər verir ki, çempionatın 6-cı günündə Azərbaycanın 6 sərbəst güləşçisi mübarizəyə qoşulacaq.

48 kq çəki dərəcəsində yarışan Hüseyn Rzazadə təsəlliverici görüşdə İran təmsilçisi Amirali Fazla qarşılaşacaq.

71 kq çəkidə mübarizə aparan Tunar Quliyev təsnifat mərhələsində qazaxıstanlı Adilet Risbayla üz-üzə gələcək. 92 kq çəki dərəcəsində isə Elgün Kərimli təsnifat mərhələsində hindistanlı Sakşam Fnu ilə qarşılaşacaq.

45 kq çəki dərəcəsində yer alan Tunar Həsənov 1/8 finalda bolqarıstanlı R. Velikovla monqolustanlı Ariun Erdenetuqsa qarşı keçiriləcək görüşün qalibi ilə üz-üzə gələcək. 51 kq çəkidə İbrahim Həsənovun 1/8 finaldakı rəqibi isə kanadalı Qaurav Bahi ilə gürcüstanlı Giorgi Narimanidze arasında keçiriləcək qarşılaşmanın qalibi olacaq.

60 kq çəki dərəcəsində mübarizə aparan Elcan Həsənov da 1/8 finaldan mübarizəyə başlayacaq. Onun rəqibi macarıstanlı Balaj Hideq ilə polşalı Vitold Pavlik arasındakı görüşün qalibi olacaq.

Daha əvvəl yunan-Roma güləşçilərimizdən Əli Cavadlı (45 kq), Abdurrahman Hüseynli (51 kq) və İsfahan Həsənov (80 kq) gümüş medal qazanıblar. Ömər Salmanov (48 kq), Elmir Çərkazov (60 kq) və Orxan Həbibli (65 kq) isə bürünc medala sahib olublar.