"Gənclik” Tələbə İdman Cəmiyyəti Respublika Şurasının təşkilatçılığı ilə ali təhsil müəssisələri tələbələri arasında XIV Respublika Universiadası keçirilir. Universiadanın təqvim planına idmanın 10 növü - şahmat, dama, stolüstü tennis, basketbol, badminton, sərbəst güləş, yunan-Roma güləşi, cüdo, atletika və voleybol (qızlar və oğlanlar) daxil edilib. Universiadanın proqramına daxil olan voleybol (kişi) üzrə yarışlar Azərbaycan Tibb Universitetinin idman zalında keçirilib.
Oğlanlar arasında keçirilən voleybol yarışlarında 12 komanda qalib adı uğrunda mübarizə aparıb. Gərgin mübarizə şəraitində keçən yarışda birinci yerə Azərbaycan Tibb Universitetinin komandası layiq görülüb. Azərbaycan Dövlət İqtisad Universiteti və
Azərbaycan Texniki Universitetinin komandaları isə müvafiq olaraq, ikinci, üçüncü yerləri tutublar.
Qızlar arasında voleybol yarışlarında isə 11 komanda mübarizə aparıb. Oğlanların yarışında olduğu kimi, burada da Azərbaycan Tibb Universitetinin komandası qalib adını qazanıb. Azərbaycan Dövlət İqtisad Universitetinin komandası ikinci, Gəncə Dövlət Universitetinin tələbələri isə üçüncü yeri tutublar.
