Birinci Avropa Oyunlarının startından 10 il ötür

Olimpizm xəbərləri

12.06.2025, 21:51

Bu gün Azərbaycan idman tarixinin ən parlaq səhifələrindən birinin - 2015-ci il I Avropa Oyunlarının başlanmasından on il ötür. 2015-ci il iyunun 12-də Bakı möhtəşəm açılış mərasimi ilə idman dünyasına qucaq açdı. Tarixdə ilk dəfə keçirilən Avropa Oyunlarına ev sahibliyi edən Azərbaycan bir sıra mühüm hadisələrlə yadda qaldı. Təkcə infrastruktur və təşkilatçılıq səviyyəsi ilə deyil, həm də bu tədbirin yaratdığı birlik, həmrəylik və milli ruhla ölkəmiz dünya miqyasında nümunə göstərildi. Təsadüfi deyil ki, Azərbaycan Avropa Oyunlarının standartlarını yaratdı.

Dünyanın gözü Bakıda idi

16 gün ərzində ölkəmiz yalnız yarışların məkanı deyil, Avropanın müxtəlif mədəniyyətlərinin qovuşduğu bir mərkəzə çevrildi. Qitənin 50 ölkəsindən 5898 idmançı ölkəmizə gəlmişdi. Onlar 20 idman növündə güclərini sınadılar. Proqrama daxil edilən 20 idman növündən 16-sı Olimpiya, 4-ü isə qeyri-Olimpiya idman növü idi. 12 Olimpiya idman növündə keçirilən yarışlar Rio-2016 Olimpiadasına lisenziya xarakteri daşıyırdı. Həmin günlər ərzində Azərbaycan təkcə idmanın deyil, həm də mədəniyyətin, tarix və müasirliyin vəhdətini nümayiş etdirdi.

Azərbaycan medallarla tarix yazdı

Ev sahibi olaraq yarışlarda güclü heyətlə iştirak edən Azərbaycan komandası əzmkarlığı ilə seçildi. İdmançılarımız 21 qızıl, 15 gümüş və 20 bürünc medal qazanaraq ümumi komanda sıralamasında 2-ci pillədə qərarlaşdı. Azərbaycan komandasına Bakı-2015-də ilk medalı karateçi İlahə Qasımova qazandırıb. 55 kq çəki dərəcəsində mübarizə aparan idmançımız fəxri kürsünün üçüncü pilləsində yer alıb. İlk qızıl medalımızın müəllifi isə digər karateçimiz Firdovsi Fərzəliyev olub. Kişilər arasında kumite yarışlarında 60 kq çəki dərəcəsində qalib olan idmançımıza qızıl medalı Azərbaycan Respublikasının Prezidenti cənab İlham Əliyev təqdim edib. Bu nəticələr təkcə idman nailiyyəti deyil, həm də dövlətin bu sahəyə ayırdığı diqqət və sistemli hazırlığın bəhrəsi idi. Müxtəlif idman növlərində qazandığımız uğurlar gənc idmançılar üçün örnək oldu, idmanın geniş kütlələr arasında daha da populyarlaşmasına təkan verdi. İlk dəfə beynəlxalq arenada parlayan bir çox idmançımız məhz Bakı 2015-dən sonra dünya miqyasında tanınmağa başladı.

30 ay kifayət etdi ki, "köhnə qitə"ni heyrətləndirək

I Avropa Oyunlarının keçirilməsi üçün ölkəmiz cəmi 30 ayda böyük infrastruktur layihələrini gerçəkləşdirdi. Bakı Olimpiya Stadionu, Avropa Oyunları Parkı və digər idman arenaları qısa müddətdə hazırlandı. Bu sürət və keyfiyyət Avropa Olimpiya Komitəsinin də rəğbətini qazandı və Azərbaycanı gələcək böyük idman tədbirləri üçün etibarlı ev sahibi kimi tanıtdı.

İdmanla birlikdə sülh və mədəniyyət mesajı

Bakı 2015 yalnız idman yarışı deyildi. Bu oyunlar mədəniyyətlərin bir araya gəldiyi, fərqli xalqların dəyərlərinin paylaşdığı, sülh və dialoqu təşviq edən beynəlxalq platformaya çevrildi. Açılış və bağlanış mərasimləri Azərbaycan mədəniyyətinin zənginliyini, qədim tariximizi və müasir inkişafımızı dünya ictimaiyyətinə təqdim etdi. Eyni zamanda bu Oyunlar Azərbaycanın beynəlxalq idman diplomatiyasında mövqeyini gücləndirdi. Bir çox ölkələrin dövlət və hökumət başçıları, nüfuzlu idman təşkilatlarının rəhbərləri Bakıya gələrək, ölkəmizin qlobal səviyyədə artan rolunun bir daha şahidi oldular.

10 ilin ardından yaddaşlarda iz buraxan günlər Artıq bu şanlı hadisədən 10 il ötür. Zaman keçsə də, Bakı 2015-in bizə yaşatdığı coşğu, birliyimizə verdiyi töhfə və yaratdığı milli qürur hissi xalqımızın yaddaşında silinməz iz buraxıb. I Avropa Oyunları Azərbaycan üçün təkcə idman uğuru deyil, həm də milli iradənin, təşkilatçılıq bacarığının simvolu oldu. Hazırda o günlərdə əsası qoyulan idman infrastrukturu və təcrübə, ölkəmizə Olimpiya oyunları da daxil olmaqla digər böyük yarışlara ev sahibliyi etmək üçün geniş imkanlar təqdim edir. Bu oyunlarla Azərbaycan təkcə medallar deyil, həm də böyük etimad qazandı. İndi isə, o uğurların üzərində qurulan idman ənənəsi daha da böyüyür, yeni nəsillərə ilham verir. Bakı-2015 artıq tarixdir - lakin bu tarix bizim milli yaddaşımızda əbədi qalacaq bir zirvədir. Azər Əlizadə

Dİgər xəbərlər

14.05.2026, 22:58

Güləşçilərimizin Los-Anceles-2028 yolu müəyyənləşdi

14.05.2026, 21:29

Paralimpiya çempionumuz xüsusi mükafata layiq görülüb

13.05.2026, 10:35

Bu gün Azərbaycan Kubokunun qalibi müəyyənləşəcək

09.05.2026, 18:18

Hərbi vətənpərvərlik mahnılarının gənc nəslin milli mənlik şüurunun formalaşmasında rolu böyükdür

07.05.2026, 23:00

Soçidə XXII Qış Olimpiadasının təntənəli açılışı keçiriləcək

07.05.2026, 14:35

AVF rəsmisi CEV-in Maliyyə Komissiyasının iclasında iştirak edib

18.02.2026, 15:04

Milan-Kortina-2026: Anastasiya Papatoma növbəti mərhələyə vəsiqə qazanıb

$\"Göstərdiyim nəticəyə görə xalqımdan üzr istəyirəm\"$

17.02.2026, 19:15

"Göstərdiyim nəticəyə görə xalqımdan üzr istəyirəm"

17.02.2026, 18:15

Milli komanda Trampı İtaliyaya dəvət edə bilər

17.02.2026, 15:38

Anasının vətənində ilk qızıl medal əldə edən idmançı oldu

17.02.2026, 13:11

Azərbaycan nümayəndə heyəti Kortina-Ampetso şəhərindədir

17.02.2026, 12:27

Gürcüstandan Qış Olimpiadasında tarixi uğur

SON XƏBƏRLƏR

BÜTÜN XƏBƏRLƏR