Bu gün MOK-un vitse-prezidenti, Olimpiya çempionu Zemfira Meftaxetdinovanın doğum günüdür

Olimpiya dünyası

Bugün, 15:42

“Şöhrət” ordenli, “Tərəqqi” medallı, Əməkdar bədən tərbiyəsi və idman xadimi, Milli Olimpiya Komitəsinin (MOK) və Azərbaycan Atıcılıq Federasiyasının vitse-prezidenti, Azərbaycan İdman Veteranlarının İctimai Birliyinin sədri, müstəqil Azərbaycanın ilk Olimpiya çempionu Zemfira Meftaxetdinovanın doğum günüdür.

Olimpnews.az xəbər verir ki, Zemfira Meftaxetdinova 1963-cü il mayın 28-də Bakı şəhərində anadan olub. Təhsilini A. Məmmədov adına 115 nömrəli tam orta məktəbdə alıb. Atıcılığa marağı olan 12 yaşlı Zemfira dərslərdən sonra qızlarla birgə evləri ilə üz-üzə olan atıcılıq tirində bu idman növü ilə məşğul olmağa başlayıb. Zemfira Meftaxetdinova Hafiz Cəfərovun rəhbərliyi altında Daxili işlər Nazirliyinin İdman Cəmiyyətində məşqlərini davam etdirib.

1979–1984-cü illərdə Azərbaycan Dövlət Bədən Tərbiyəsi İnstitutunda, 2000–2005-ci illərdə isə Bakı Dövlət Universitetində təhsil alıb. Zemfira Meftaxetdinova Dünya və Avropa çempionatlarında da dəfələrlə qələbə qazanıb. O, 1993, 1997 və 2003-cü illərdə stend atıcılığı üzrə Avropa çempionatlarının qalibi olub. Ümumi olaraq beş dəfə Avropa çempionu olan Zemfira Meftaxetdinova 1995 və 2001-ci illərdə Dünya çempionatlarının qızıl medalını qazanıb. Sidney-2000 XXVII Yay Olimpiya Oyunlarında stend atıcılığı üzrə yarışlarda qızıl, Afina-2004 XXVIII Yay Olimpiya Oyunlarında bürünc medal qazanıb.

Zemfira Meftaxetdinova Azərbaycan idmanında xidmətlərinə görə Azərbaycan Prezidenti Heydər Əliyevin Sərəncamına əsasən 1995-ci ildə "Tərəqqi" medalı, 2000-ci ildə "Şöhrət" ordeni, Azərbaycan Prezidenti İlham Əliyevin Sərəncamına əsasən Azərbaycan Prezidenti İlham Əliyevin Sərəncamına əsasən 2004-cü ildə "Tərəqqi" medalı, 2022-ci ildə Azərbaycan Respublikası Prezidentinin fəxri diplomu ilə təltif olunub. Daxili işlər orqanlarında xidmətlərinə görə 2018-ci ildə "Vətən uğrunda" medalına layiq görülüb.

Zemfira xanımı bütün olimpiyaçılar və ölkəmizin idman ictimaiyyəti adından təbrik edirik.