İki guləşçimiz Avropa çempionatının finalında

Güləş

22.05.2026, 22:22

Bolqarıstanın Samokov şəhərində güləş üzrə U15 Avropa çempionatı davam edir.

Olimpnews.az Azərbaycan Guləş Federasiyasının mətbuat xidmətinə istinadən xəbər verir ki, yarışın üçüncü günündə iki güləşçimiz Avropa çempionatının finalına yüksəlib.

Qadın güləşi

Gülay Xasməmmədova (36 kq) türkiyəli Damla Beyan (12:5), polşalı Nikola Pşiblin (tuş) və ukraynalı Oleksandra Sozinovaya (tuş) qalib gələrək finala vəsiqə qazanıb. Təmsilçimiz sabah həlledici görüşdə rusiyalı Yelizaveta Kirillovayla güləşəcək.

Leyla Əsgərova (42 kq) təsnifat mərhələsində rusiyalı Kseniya Sitenkovaya 2:6 hesabıyla məğlub olub.

Günel Kərimli (50 kq) niderlandlı Yuna Vallenburqu “tuş”la mübarizədən kənarlaşdırsa da, 1/4 finalda ukraynalı İvanna Maydanska ilə bacarmayıb – 3:13.

Zərifə Əliyeva (58 kq) debütdə belaruslu Arina Dudkaya (1:3), Fatimə Qayqiyeva (65 kq) isə macarıstanlı Jofiya Yunqa (0:10) uduzub.

Sərbəst güləş

Yusif Bədəlov (68 kq) 1/8 finalda belaruslu Kiril Prızə (4:8), Xəyal Şükürlü (75 kq) isə təsnifat mərhələsində yunanıstanlı Xristos Taxmazidisə (4:5) məğlub olub.

Əvəzində Elvin Necəfzadə (85 kq) heç bir rəqibinə şans tanımayıb. O, belaruslu Yaqor Staskeviçə (10:0) və ukraynalı Borimir Kotlyara (tuş) vaxtından əvvəl qalib gəlib. Yarımfinalda türkiyəli Poyraz Bilgini 6:0 hesabıyla üstələyən Necəfzadə adını finala yazdırıb. Elvin sabah həlledici qarşılaşmada rusiyalı İbragim Maqomedovla güləşəcək.