Masallı Olimpiya İdman Kompleksində SSRİ idman ustası, Əməkdar məşqçi, tanınmış pəhləvan Nadir Ağayevin xatirəsinə həsr olunmuş yeniyetmələr arasında yunan-Roma güləşi üzrə XXVIII ənənəvi Lənkəran-Astara region açıq turniri keçirilib.
Azərbaycan Güləş Federasiyası, Lənkəran-Astara Regional Gənclər və İdman İdarəsinin birgə təşkilatçılığı ilə keçirilən yarışda əvvəlcə ulu öndər Heydər Əliyevin və Vətən yolunda canından keçən şəhidlərin xatirəsi bir dəqiqəlik sükutla anılıb, Dövlət himnimiz oxunub.
Lənkəran-Astara Regional Gənclər və İdman İdarəsinin əməkdaşı Yusif
Xamıyev bildirib ki, yarışın təşkilində əsas məqsəd Nadir Ağayevin keçdiyi şərəfli idman yolunun təbliği, yeniyetmələr arasında yunan-Roma güləşi idman növünün inkişafı və kütləviliyinin artırılmasından ibarətdir. Qeyd olunub ki, yarış həmçinin idmançılar arasında dostluq əlaqələrinin daha da inkişafı, eyni zamanda yeniyetmələrdən ibarət yığma komandaya namizədlər seçmək baxımından da əhəmiyyətlidir. Yarışda çıxış edən digər qonaqlar Nadir Ağayev güləş məktəbinin Azərbaycan idmanında tutduğu mövqedən söz açıb, mötəbər yarışlarda əldə edilən nailiyyətlərin ölkə rəhbəri, Milli Olimpiya Komitəsinin prezidenti İlham Əliyev tərəfindən idmana göstərilən diqqət və qayğının təzahürü olduğunu deyib və idmançılara uğurlar arzulayıblar.
Çıxışlardan sonra yarışlara start verilib. İki gün davam edən turnirdə 2008-2010-cu il təvəllüdlü güləşçilər 10 çəki dərəcəsində qələbə uğrunda mübarizə aparıblar. Dünya Güləş Birliyinin təsdiq etdiyi qaydalara uyğun olaraq Azərbaycan Güləş Federasiyasının hakimlər heyəti tərəfindən idarə edilən yarışlarda respublikanın müxtəlif rayon və şəhərlərdən ibarət 25-ə yaxın komandanın tərkibində 200-dən yuxarı yeniyetmə yunan-Roma güləşçisi qüvvəsini sınayıb.
Qalib idmançılara təşkilat komitəsi, eləcə də sponsor tərəfindən müvafiq
dərəcəli diplom, medal və pul mükafatları verilib.
Zəfər Orucoğlu,
Azərbaycan Jurnalistlər Birliyinin üzvü
