Ölkə çempionu "Rabitə” yeni mövsüm üçün heyətini formalaşdırmağa davam edir. Çempionlar Liqasının gümüş medalını qazanan paytaxt təmsilçisi Aurea Kruzla müqavilənin müddətini uzadıb. 2012/2013-cü illər mövsümündən "Rabitə”nin şərəfini qoruyan puerto-rikalı ulduz voleybolçu yeni ildə də bu komandada çıxış edəcək. Bununla da komandadakı oyunçuların sayı 17-yə çatıb. Son illərin dəyişməz Azərbaycan çempionu Kruza qədər Katarjina Skovronska (1 il), Katarjina Skorupa və Nutsara Tomkomla (2 il) da müqavilənin müddətini uzatmışdı. Həmçinin, müqaviləyə əsasən Brenda Kastillo, Foluke Akenradevo (daha 1 il), Rozanna Giel Ramos, Yoana Palasio Mendoza, Salas Vilma Rosell, Xiselye da Silva Franko ( hamısı 5 il), Tori Dikson, Gina Mankuso, Kristi Cekson, Kayla Banvart, Britni Kuper, Reyçel Rurk və Dora Horvat (hamısı daha 2 il) da "Rabitə”nin uğurları üçün çalışmaqda davam edəcəklər.
Yeri gəlmişkən deyək ki, Aurea Kruz "Rabitə”nin ölkə çempionu olması münasibəti ilə maraqlı açıqlama verib. "Azərbaycan Super-liqası mənim üçün uğurla yekunlaşdı. Komandamın 7-ci çempionluğunda pay sahibi olduğum üçün xoşbəxtəm. Çempionlar Liqasında məqsədimizə nail ola bilməsək də, Azərbaycan çempionu tutulunu qoruduq. "Rabitə”klubunun azarkeşlərini 7-ci çempionluq münasibəti ilə təbrik edirəm. Super Liqa gərgin keçsə də, komandamız üçün qalib gəlmək elə də çətin olmadı. Qızıl medallarla yanaşı, çempionatın 3 nominasiyasında birinci olmağım isə məni çox sevindirdi”.