Beynəlxalq Voleybol Federasiyası qadın komandaların yeni reytinq siyahısını açıqlayıb. Təxminən 10 aylıq müddətdən sonra tərtib olunan siyahıda Azərbaycan millisinin mövqeyi dəyişməz qalıb.
Belə ki, dünya Qran-prisinin yekunlarına əsasən açıqlanan cədvəldə Faiq Qarayevin yetirmələri yenə 37-ci pillədədirlər. Komandamız yalnız Avro-2013-də oynamaqla (15-ci yer), aktivinə 2 xal əlavə edib və reytinq xalını 17-yə çatdırıb. Sentyabrın 23-də start götürəcək dünya çempionatındakı rəqiblərimizdən ən böyük yüksəlişə Belçika millisi imza atıb. Avropa çempionatının bürünc mükafatçıları 5 pillə irəliləyiblər. Aktivində 57 xalı olan belçikalılar Əlcəzairlə 17-18-ci yerlərdə qərarlaşıblar. Rəqiblərimizdən Puerto-Rika da 1 pillə irəliləyib. Onlar siyahıda 16-cı yerdə qərarlaşıblar (61 xal). Digər rəqiblərimizə gəlincə, Yaponiya və Çin millimiz kimi mövqelərini qoruyub. Asiyalılar, müvafiq olaraq, 3-cü (301 xal) və 5-ci (222 xal) pillədədirlər. Onlardan fərqli, Kuba yığması reytinq sıralamasında geriləyib. Komanda 1 pillə aşağı düşməklə, 22-ci yerdə qərarlaşıb (50 xal).
Qeyd edək ki, ilk "üçlük” dəyişməz qalıb. Qran-prinin qalibi olan Braziliya 320 xalla yenə cədvələ başçılıq edir. İkinci yerdə isə 315 xalla ABŞ millisi qərarlaşıb.
jpg-1734007141.jpg)
