Ötən həftə keçirilən otüstü hokkey üzrə "Çelenc” kuboku yarışları Azərbaycan komandaları üçün uğurla başa çatıb. Qadınlardan ibarət "Atasport” komandası Çexiyanın paytaxtı Praqada "Çelenc 1” kubokunda mübarizə aparıb. Klublar 2 yarımqrupda yarışıblar. Bütün rəqiblərini üstələyən "Atasport” bu nəticə ilə daha nüfuzlu "Troffi” kubokuna vəsiqə qazanıb. "Akkord” komandası isə Yunanıstanın paytaxtı Afinada keçirilən "Çelenc 2” kubokunda qalib gəlib. 8 komandanın iki qrupda mübarizə apardığı bu yarışda təmsilçilərimiz "Partille” (İsveç), "Raça” (Slovakiya), "Academiko Espinio” (Portuqaliya) klubları ilə qarşılaşıblar. İsveçlilərə 4:3, slovakiyalılara 4:1, portuqaliyalılara 5:1 hesabı ilə qalib gələn "Akkord” final mərhələsinə yüksəlib. Həlledici mərhələdə Danimarkanın "Soerbumagle” klubu ilə üz-üzə gələn hokkeyçilərimiz rəqiblərini 6:3 hesabı ilə məğlub ediblər. Rəqib komandaların qapısından 19 top keçirən "Akkord” öz qapısından cəmi 8 top buraxıb. Qeyd edək ki, komandanın vurduğu 19 topdan 11-i hücumçu Saleh Balamiyevin payına düşüb. Beləliklə, "Çelenc 2” kubokunda uğur qazanan "Akkord” "Çelenc 1” kubokuna vəsiqə qazanıb.