İtaliyanın Siena şəhərində keçirilən polo üzrə Avropa çempionatının üçüncü turunda Azərbaycan millisi Slovakiya yığması ilə qarşılaşıb.Komandamız növbəti uğura imza ataraq üç oyunluq qələbə seriyasını davam etdirib.
Azərbaycan yığması rəqibi 11:7 hesabı ilə məğlub edərək yarışın favoritləri sırasında yer alıb.
Slovakiya yığmasını məyus edən yığmamızın heyətində Tərlan Qurbanəliyev və Əli Rzayev xüsusilə fərqləniblər.
Bu gün keçiriləcək Polo üzrə qitə çempionatının 4-cü turunda millimiz hazırkı Avropa çempionu İrlandiya komandası ilə qarşılaşacaq.
Qeyd edək ki, Azərbaycan milli komandası Avropa çempionatının ilk turunda Hollandiya seçməsini (7:3), ikinci turda isə Fransa millisini (8:4) məğlub edib.
Xatırladaq ki, Beynəlxalq Polo Federasiyası və İtaliyanın Atçılıq İdmanı Federasiyası tərəfindən birgə təşkil edilən Polo üzrə Avropa çempionatı sentyabrın 30-dək davam edəcək. Keçiriləcək 4 oyunun nəticəsinə əsasən ən çox xal toplayan komanda finalda digər qrupun qalibi ilə qarşılaşacaq.