Kazanda qılıncoynatma üzrə Ümumrusiya açıq "Yeni il” turniri keçirilib. 130 yeniyetmə oğlan şpaqaçının mübarizəsində qılıncoynadanlarımızdan Barat Quliyev, Raul Aruslanov və Kənan Məlikzadə qüvvələrini sınayıblar. Barat Quliyev qrup mərhələsində keçirdiyi 5 görüşdən 2-ni qalib başa vurmaqla pley-offa yüksəlib. 1/64 finalda Rusiya idmançısı Aleksey Borodini məğlub edən təmsilçimiz növbəti mərhələdə digər rusiyalı idmançı Aleksey Vinoqradova uduzub.
Digər şpaqaçımız Raul Aruslanov da qrup mərhələsini adlamağı bacarıb. Qrupda keçirdiyi 6 görüşdən 2-də qalib gələn idmançımız 1/64 finalda Tatarıstan idmançısı Daniel Əskərova məğlub olub. Qrupda keçirdiyi 6 görüşdən 1-də qələbə qazanan K.Məlikzadə isə mübarizəni erkən dayandırıb.
Yüz otuz yeddi yeniyetmə qız şpaqaçının yarışında isə ölkəmizi Azərin İdriszadə, Nazilə Rəhimova, Alfiyə Abdinova və Aysu Nuriyeva təmsil ediblər. Qrup mərhələsində keçirdiyi 6 görüşdən 3-də qalib gələn A.İdriszadə 1/64 finalda rusiyalı Yekaterina Tarasovaya uduzub. Qrupda keçirdiyi 6 görüşdən 2-də qələbə qazanan N.Rəhimova isə 1/64 finalda Özbəkistan idmançısı Sevara Rəhimovaya məğlub olub. A.Abdinova da 6 görüşdən 2-də qalib gələrək pley-offa yüksəlib. Şpaqaçımız 1/64 finalda rusiyalı Mariya Melexinaya uduzub. Altı görüşdən 1-də qələbə əldə edən A.Nuriyeva isə qrup mərhələsini adlaya bilməyib.