"Səhər sessiyasında bütün elementləri dəqiq yerinə yetirdim və bu, finala yüksəlməyimə imkan verdi”.
Bu sözləri Bakıda keçirilən batut gimnastikası və tamblinq üzrə dünya kuboku yarışlarının finalına vəsiqə qazanmış Azərbaycan idmançısı, Avropa çempionu Mixail Malkin deyib.
Gimnastımız bildirib ki, Milli Gimnastika Arenasında gözəl abı-hava höküm sürür. Belə bir arenada çıxış etmək çox möhtəşəmdir.
"Əsas rəqibim Rusiya idmançısı Vadim Afanasyevdir. Bizim mübarizəmizi Avropa çempionunun dünya çempionuna qarşı mübarizəsi kimi xarakterizə etmək olar. Ümid edirəm ki, sabah keçiriləcək final mərhələsində uğurla çıxış edib xalqımızı sevindirəcəyəm”, - deyə Mixail Malkin əlavə edib.
Turnirdə 30 ölkədən 160-dən artıq gimnast mübarizə aparır.
Qeyd edək ki, Dünya kuboku yarışlarına fevralın 17-də yekun vurulacaq.
