Üç güləşçimiz Avropa Oyunlarının yarımfinalında

Üç güləşçimiz Avropa Oyunlarının yarımfinalında

Bu gün ikinci Avropa Oyunları çərçivəsində sərbəst güləş yarışlarına start verilib. Yarışların birinci günündə 4 pəhləvanımız mübarizəyə başlayıb.
Güləşçilərimizdən Mahir Əmiraslanov (57 kq) səkkizdəbir finalda bolqarıstanlı Georgi Vangelova 6:5 hesabı ilə qalib gələrək növbəti mərhələyə yüksəlib. Dörddəbir finalda Şimali Makedoniya təmsilçisi Vladimir Yeqorovu 4:0 hesabı ilə məğlub edən idmançımız yarımfinala yüksəlib. Yarımfinalda idmançımızın rəqibi rusiyalı Zavur Uquyev olacaq. 
Digər pəhləvanımız Aleksandr Qostiyev (86 kq) isə səkkizdəbir finalda Moldova təmsilçisi Denis Balaur üzərində 7:1 hesablı qələbə qazanıb. Təmsilçimiz dörddəbir finalda Gürcüstan idmançısı Sandro Aminaşvilini məğlub edib – 6:2. Idmançımızın növbəti mərhələdəki rəqibi Dauren Kuruqliyev olacaq.
İkinci Avropa Oyunlarında mübarizə aparan Cəmaləddin Maqomedov (125 kq) isə səkkizdəbir finalda Belarus idmançısı Vitali Piasniaka 6:5 hesabı ilə qalib gəlib. Idmançımız yarımfinala vəsiqə uğrunda macarıstanlı Daniel Ligeteni 6:5 hesabı ilə məğlub edib. Yarımfinalda idmançımız Gürcüstan təmsilçisi Givi Matxaraşvili ilə qarşılaşacaq.
Digər pəhləvanımız Hacımurad Qadcıyev (74 kq) isə ilk görüşdə türkiyəli Söner Demirtaşa 3:4 hesabı ilə uduzub.