Belarusun paytaxtı Minskdə II Avropa Oyunlarında qadın güləşçilərin yarışı davam edir.
Bu gün xalça üzərinə çıxan 4 çəki dərəcəsində 1/4 final qarşılaşmaları keçirilib.
Azərbaycan yığmasının dörd üzvü yarımfinala vəsiqə uğrunda mübarizə aparıb. Onlardan üçü finalın bir addımlığına irəliləməyə nail olub.
Yarışa 1/4 finaldan başlayan Mariya Stadnikin (50 kq) Anna Lukasiak (Polşa) üzərində asan qələbə qazanıb. O, 40 saniyəyə 10:0 hesablı üstünlük əldə edib. M.Stadnik Bakı vaxtı ilə saat 19:00-da başlayacaq yarımfinalda türkiyəli Evin Demirhanla üz-üzə gələcək.
Alyona Kolesnik (57 kq) Mimi Xristovaya (Bolqarıstan) uduzub – 0:6. Güləşçimiz təsəlliverici görüşlərə qatılmaq üçün rəqibinin finala yüksəlməsini gözləməlidir.
Elmira Qəmbərova (62 kq) polşalı Katarjina Madrovska ilə görüşdə qalib gəlib – 9:0. Təmsilçimiz yarımfinalda rumıniyalı Krista İnçe ilə qarşılaşacaq. Görüş Bakı vaxtı ilə saat 19:20-də başlayacaq.
Səbirə Əliyeva (76 kq) böyük britaniyalı Corcina Neltorp üzərində qələbə qazanıb – 8:2. Güləşçimiz saat 19:30-də başlayacaq yarımfinalda almaniyalı Frensi Raedeltlə üz-üzə gələcək.
