Noyabrın 25-də UEFA Konfrans Liqasının qrup mərhələsi çərçivəsində beşinci turun oyunları keçirilib. Azərbaycanın turnirdəki yeganə təmsilçisi “Qarabağ” klubu doğma meydanda Kiprin “Omoniya” komandasını qəbul edib. Tofiq Bəhramov adına Respublika Stadionunda təşkil olunan oyunda qalib müyyənləşməyib -2:2. Danimarkalı FIFA referisi Morten Kroxun idarə etdiyi oyunda hesabı 43-cü dəqiqədə qonaqlar açıblar. Onbirmetrlik cərimə zərbəsindən sonra Mixal Dyuriş fərqlənib. Qarşılaşmanın 49-cu dəqiqəsində "Omoniya"nın futbolçusu Paris Pslatis topu səhvən öz qapısına göndərərək hesabı bərabərləşdirib. Oyunun 88-ci dəqiqəsində Ağdam təmsilçisinin futbolçusu Patrik Andrade fərqlənsə də qonaq komanda 90-cı dəqiqədə yenidən hesaba tarazlıq gətirib. Beləliklə, "Qarabağ" - "Omoniya" matçı 2:2 hesabı ilə başa çatıb.
Qrupun digər matçında isə İsveçrənin "Bazel" klubu səfərdə "Kayrat"ı 3:2 hesabı ilə məğlub edib.
Hazırda "Bazel" klubu 11 xalla birinci pillədə qərarlaşıb. Onunla eyni xala malik olan "Qarabağ" ikincidir. 3 xalı olan "Omoniya" üçüncü, 1 xalı olan "Kayrat" isə qrupda sonuncu pillədə qərarlaşıb.
Qeyd edək ki, UEFA Konfrans Liqasında qrup liderləri birbaşa səkkizdəbir finala yüksələcəklər. İkinci yeri tutan komandalar isə UEFA Avropa Liqasında qrupları üçüncü sırada başa vuran kollektivlərlə pley-off matçları oynayacaqlar.
“Qarabağ” qrup liderliyini əldən verdi
![“Qarabağ” qrup liderliyini əldən verdi](https://olimpnews.az/uploads/img/posts/2021/11/26/Qarabagjpg-1637915456.jpg)