Perunun paytaxtı Lima şəhərində keçirilən stend atıcılığı üzrə dünya çempionatı davam edir. Yarışların ilk günləri komandamız üçün heç də uğurlu alınmayıb. Belə ki, hədəf önünə keçən 3 snayperimizdə dəqiqlik çatmayıb. Təmsilçilərimizdən Skit növündə mübarizə aparan Emin Cəfərov 112 xal toplayıb. O, bu nəticə ilə dünya çempionatını 56-cı yerdə başa vurub. Həmin növdə gənclərin yarışında iştirak edən Niyaz Ağazadə və Fuad Qurbanov da mükafatçılar sırasına düşə bilməyiblər. Onlar, müvafiq olaraq, 33 idmançı arasında 27-ci və 29-cu yerləri tutublar.
Qeyd edək ki, sentyabrın 25-də başa çatacaq dünya çempionatında daha 3 idmançımız nəyə qadir olduğunu göstərəcək. Elvin İsmayılov böyüklərin, Əlimirzə Quliyev və Əli Hüseynli (hər üçü trap) isə gənclərin yarışında mübarizə aparacaqlar.