Oktyabrın 10-11-dək Bakıda bədii gimnastika üzrə 20-ci Bakı çempionatı keçiriləcək.
Olimpnews.az-ın verdiyi xəbərə görə, yarışda "Neftçi”, Bakı Gimnastika Məktəbi, Respublika Kompleks İdman Məktəbi, "Spartak”, "Sərhədçi” və Daxili İşlər Nazirliyi İdman Cəmiyyəti, Nizami Rayon Uşaq-Gənclər Yaradıcılıq Mərkəzinin gimnastlarından başqa, "Baku Flames”i təmsil edəcək gənc idmançıları da yarışacaqlar. Gimnastlar altı yaş qrupunda qüvvələrini sınayacaqlar.
Ümumilikdə 92 gimnastın iştirakı ilə keçiriləcək çempionatda seniorka və yuniorlar, həmçinin 2001-2002, 2003, 2004 və 2005-ci il təvəllüdlü iştirakçılar da qatılacaqlar. İdmançılar yalnız mütləq çoxnövçülükdə medallar uğrunda mübarizə aparacaqlar.
Məlumat üçün qeyd edək ki, Bakı turniri noyabrda İsmayıllı Olimpiya İdman Kompleksində keçiriləcək Azərbaycan çempionatına hazırlıq xarakteri daşıyır.
