Mingəçevirdən sonra Masallı və Gəncə gimnastları da hazırlıq prosesi üçün paytaxtımızdadır
Gəncə Olimpiya İdman Klubu və Masallı Olimpiya İdman Kompleksinin bədii gimnastika bölməsinin üzvləri Milli Gimnastika Arenasında keçirilən təlim-məşq toplanışında iştirak edirlər. Noyabrın 5-dək davam edəcək hazırlıqlarda ümumilikdə hər iki komandadan 10 idmançı iştirak edir. Məşqlərin təşkili idmançıların hazırlıq səviyyəsinin gücləndirilməsi, eləcə də 8-11 dekabr tarixlərində Şəki şəhərində keçiriləcək Azərbaycan Gimnastika Federasiyasının yenidən qurulmasının 20 illiyinə həsr olunmuş birgə yarışlar çərçivəsində təşkil ediləcək bədii gimnastika üzrə 27-ci Azərbaycan birinciliyinə hazırlıq xarakteri daşıyır.
Qeyd edək ki, Gəncə Olimpiya İdman Klubunda 2021-ci ildən, Masallı Olimpiya İdman Kompleksində isə 2019-cu ildən bədii gimnastika bölməsi fəaliyyət göstərir.
Məlumat üçün bildirək ki, bölgələlərdə gimnastikanın inkişafı çərçivəsində müxtəlif regionlardan gimnastların paytaxtda mütəmadi olaraq təlim-məşqlərdə iştirakı nəzərdə tutulur.
Xatırladaq ki, bundan əvvəl Mingəçevir Kür Olimpiya Tədris-İdman Mərkəzinin bədii gimnastika üzrə komandası Milli Gimnastika Arenasında təşkil olunan hazırlıq prosesində iştirak etmişdi.
