Bədii gimnastika üzrə 20-ci Bakı çempionatının yarışları başa çatıb. 2 gün davam edən yarışda "Neftçi” İSM, Bakı Gimnastika Məktəbi, Respublika Kompleks İdman Məktəbi, "Spartak”, "Sərhədçi”, Daxili İşlər Nazirliyi İdman Cəmiyyəti, Nizami Rayon Uşaq-Gənclər Yaradıcılıq Mərkəzinin gimnastları və "Baku Flames” klubunun gənc idmançıları qalib adı uğrunda mübarizə aparıblar. Ümumilikdə 92 gimnastın iştirakı ilə keçirilən yarışda gənclər, həmçinin 2001-2002-ci, 2003-cü, 2004-cü və 2005-ci il təvəllüdlü iştirakçılar da iştirak ediblər. Altı yaş qrupu üzrə keçirilən turnirin birinci günündə 2003-cü, 2004-cü və 2005-ci il təvəllüdlü gimnastlar mübarizə aparıblar. Maraqlı mübarizə şəraitində keçən yarışda 2005-ci il təvəllüdlü idmançılar arasında Fidan Şirinova ("Neftçi”) fəxri kürsünün ən yüksək pilləsinə qalxıb. Elnarə Cabbarova (Bakı Gimnastika Məktəbi) ikinci, Selcan Hacızadə isə (Respublika Kompleks İdman Məktəbi) üçüncü yerə layiq görülüblər. 2004-cü il təvəllüdlü gimnastların mübarizəsində Arzu Cəlilova ("Neftçi”) birinci yeri tutub. Zərnigar Əliyeva ("Neftçi”) ikinci, Alyona Vişnevskaya (Bakı Gimnastika Məktəbi) isə üçüncü yerlə kifayətləniblər. Çempionatda 2003-cü il təvəllüdlü qızlar arasında Darya Farşbafşəhriyari (Bakı Gimnastika Məktəbi) qızıl medala layiq göürülüb. Aydan Ağayeva və Ləman Hüseynova isə (hər ikisi "Spartak”) müvafiq olaraq ikinci, üçüncü yerləri tutublar.
Çempionatın ikinci günündə 2001-2002-ci illər təvəllüdlü idmançılar mübarizə aparıblar. Maraqlı keçən mübarizədə İlahə Məmmədova (Bakı Gimnastika Məktəbi) birinci, Leyli İbrahimova ("Spartak”) ikinci, Natalya Quliyeva (Respublika Kompleks İdman Məktəbi) üçüncü yeri tutub.
Gənclərin yarışında isə Jalə Piriyeva (Milli komanda) fəxri kürsünün ən yüksək pilləsində qərarlaşıb. Digər gimnastlar Ayşən Bayramova (Milli komanda) ikinci, Samirə Cəfərova (Bakı Gimnastika Məktəbi) üçüncü yerlə kifayətləniblər.
Məlumat üçün qeyd edək ki, Bakı birinciliyi noyabr ayında İsmayıllı Olimpiya İdman Kompleksində təşkil olunacaq Azərbaycan çempionatına hazırlıq xarakteri daşıyıb.
