Azərbaycan Voleybol Federasiyası (AVF) "Xarı Bülbül Şuşa" və “Xarı Bülbül Laçın” komandalarının üzləşdiyi maliyyə çətinliyi ilə əlaqədar açıqlama ayıb.
Federasiyanın mətbuat xidmətindən verilən məlumata görə, AVF yaranmış maliyyə çətinliyi ilə əlaqədar komandalara dəstək olmaq üçün bütün imkanlarını səfərbər edib.
"Məlum olduğu kimi, müstəqil şəkildə fəaliyyət göstərən kişi voleybolçulardan ibarət “Xarı Bülbül Şuşa” və “Xarı Bülbül Laçın” komandaları Azərbaycan çempionatında, “Xarı Bülbül Şuşa” həm də “Çelenc Kuboku”nda iştirak edirlər. Mövsümün əvvəlində klubların yerli və xarici voleybolçulardan ibarət heyətləri formalaşaraq, bütün xərclərin ödənməsi ilə bağlı sponsorlarla razılığa gəlinib.
“Xarı Bülbül Voleybol Klubu” Məhdud Məsuliyyətli Cəmiyyəti 5 iyun 2023-cü il tarixli müraciəti ilə Azərbaycan Voleybol Federasiyası (AVF) qarşısında öhdəlik götürmüş və bu barədə klub tərəfindən federasiyaya müvafiq zəmanət məktubu təqdim edilib. Eyni zamanda klub Avropa Voleybol Konfederasiyasına müraciət edərək müvafiq qaydada sənədləri təqdim etməklə “Çelenc Kuboku”nda öz iştirakını təsdiqləyib.
Daha sonra klubun maliyyə çətinliyi ilə üzləşməsinə dair AVF-yə şifahi məlumat daxil olub və bununla bağlı işçi heyəti və oyunçularla görüş keçirilib. Toplantı zamanı yaranmış maliyyə çətinliyi ilə əlaqədar müzakirələr aparılıb və klubun müvafiq sənədləri federasiyaya təqdim etməsindən sonra AVF tərəfindən bir aylıq maliyyə dəstəyinin göstəriləcəyi bildirilib.
Klub tərəfindən rəsmi sənədlər federasiyaya təqdim olunduqdan sonra AVF klubun ölkəmizi “Çelenc Kuboku”nda təmsil etdiyini nəzərə alaraq, qısa zamanda “Xarı Bülbül Şuşa” və “Xarı Bülbül Laçın” komandalarının oyunçularının bir aylıq əməkhaqqını ödəyib", - deyə məlumatda bildirilib.
Xatırladaq ki, bu günlərdə ölkə mətbuatında kişilərdən ibarət "Xarı Bülbül Şuşa" və "Xarı Bülbül Laçın" komandalarının maliyyə çətinliyi səbəbindən dağılmaq təhlükəsi ilə üz-üzə qalması barədə məlumatlar yer almışdı.
