Çexiyanın Teplitse şəhərində yeniyetmələr arasında keçirilən cüdo üzrə Avropa Kubokunun ilk günü Azərbaycan millisinin uğurlu çıxışı ilə yadda qalıb. Cüdoçularımız mötəbər yarışda ümumilikdə 7 medal qazanaraq turnirin ilk gününü medal sıralamasında birinci pillədə başa vurublar.
Qızlar arasında -48 kq çəki dərəcəsində çıxış edən Nərmin Ağamirzadə və oğlanların yarışında -55 kq-da mübarizə aparan Rəsul Əlizadə bütün rəqiblərini məğlub edərək qızıl medal qazanıblar. -44 kq çəki dərəcəsində Gülşən Hüseynova gümüş medal əldə edib. Digər təmsilçilərimizdən Mədinə Hüseynova (-40 kq), Anar Quliyev (-50 kq), Röyal Qayıbov (-60 kq) və Əli Hümbətov (-66 kq) isə bürünc medala sahib olublar.
Qeyd edək ki, turnirdə 38 ölkədən ümumilikdə 805 cüdoçu iştirak edir.
