Kimano ustalarımız qitə çempionatına yola düşüblər

Fevralın 7-9-da Portuqaliyanın Lissabon şəhərində karate üzrə yeniyetmə və gənclər arasında Avropa birinciliyi keçiriləcək. Yarışa yollanan Azərbaycan karateçiləri bir sıra çəkilərdə medallara namizədlər sırasındadırlar. Komandamız yarışa əməkdar məşqçilər Vahid Ayvazov, Anar Allahverdiyev, Şahin Xudaverdiyev, eləcə də Rafael Ağayev və Elnur Allahverdiyevin rəhbərliyi altında ciddi hazırlaşıb. Xatırladıq ki, kimano ustalarımız yanvarın ikinici yarısında "Kharkov Open” beynəlxalq turnirini yüksək nəticələrlə başa vuraraq ümumi komanda hesabında birinci olmuşdular.

Xatırladaq ki, 2013-cü ilin fevralında Konyada keçirilən ötən Avropa çempionatında karateçilərimiz 7 medala sahib çıxmışdılar. Tural Ağalarzadə (-68 kq, 18-21 yaşlı gənclər) çempion adını qazanmışdı. Aytac Əliyeva (-54 kq, 16-17 yaşlı yeniyetmələr) gümüş, Ülvi Qurbanov (-52 kq, 16-17 yaşlı yeniyetmələr), Nicat Abbasov (-55 kq) və Sərxan Quluzadə (+76 kq, hər ikisi 16-17 yaşlılar), həmçinin Asiman Qurbanlı (+78 kq, 18-21 yaşlı gənclər) bürünc mükafat əldə etmişdilər. Qitə çempionatına yollanan heyət üzvləri arasında son dünya çempionatının medalçıları da var. İdmançılarımızdan ikisi 2013-cü ilin noyabrında İspaniyanın Quadalahara şəhərində keçirilən yeniyetmə və gənclərin dünya çempionatında medal qazanmışdılar. Fəridə Əliyeva (+54 kq, 14-15 yaşlı yeniyetmələr) bürünc, Tural Ağalarzadə (+54 kq, 18-21 yaşlı gənclər) isə gümüş mükafata layiq görülmüşdü. Qitə çempionatında 19 idmançımız mübarizə aparacaq.