Olimpiya oyunlarının keçirildiyi tarixdə ilk dəfə olaraq Olimpiya statusu bərpa edildi. Beynəlxalq Olimpiya Komitəsi (BOK) Hindistana Olimpiya oyunlarında iştirakla bağlı tətbiq edilən qadağanı aradan qaldırıb. Qadağanın ləğvi fevralın 10-da Narayan Ramaçandranın Hindistan Milli Olimpiya Komitəsinə yeni prezident seçilməsindən sonra mümkün olub.
Hindistan yığması Olimpiadada çıxışını öz bayrağı altında davam etdirmək imkanına sahib olacaq. BOK-un kommunikasiyalar üzrə direktoru Mark Adams çərşənbə axşamı KİV-ə açıqlamasında bəyan edib: "Olimpiya oyunlarının keçirildiyi tarixdə ilk dəfə olaraq Olimpiya statusu bərpa edildi və bundan sonra Hindistan öz bayrağı altında çıxış etməkdə davam edəcək”.
Qeyd edək ki, BOK 2012-ci ilin dekabrında Hindistanı ölkə MOK-un rəhbərliyinə korrupsiyada şübhəli bilinən məmurların seçilməsindən sonra Olimpiya oyunlarında iştirakdan müvəqqəti kənarlaşdırmışdı. Hindistan idmançıları Soçi Olimpiadasında milli deyil, Olimpiya bayrağı altında çıxış edirdilər.
