“Olimpsport” jurnalının Zəfər buraxılışı çapdan çıxıb.
Olimpnews.az xəbər verir ki, 2008-ci ildən mütəmadi nəşr olunan jurnalın bu sayında “Qarabağ” futbol klubunun UEFA Çempionlar Liqasının Liqa mərhələsinə yüksələrək tarix yazması geniş şəkildə yer alıb. Buraxılış həmçinin, Azərbaycan Milli Mətbuatının 150, Azərbaycan İdman Jurnalistləri Assosiasiyasının (AİJA) 30 illik yubileylərinə həsr edilib.
Zəfər buraxılışının üz qabığı xüsusi dizayna malikdir və “Qarabağ” FK-nın futbolçularının ruh yüksəkliyi ilə dolu komanda fotosu üzərində əks olunub.
Jurnalın giriş bölməsində Azərbaycan Prezidenti, Milli Olimpiya Komitəsinin prezidenti İlham Əliyevin fotoportreti və milli maarifçilik ənənələrinin davamı ilə bağlı fikirləri təqdim olunur.
Yeni sayda idman ictimaiyyəti üçün önəmli hesab edilən bir sıra mövzular geniş işıqlandırılıb. “Növbəti tarixi zirvə – ‘Qarabağ’ FK” adlı məqalədə komandanın beynəlxalq arenada göstərdiyi performans, ardıcıl uğurları və tarixi qələbələri ilə bağlı yazı verilib.
Buraxılışda dövlət başçısı İlham Əliyevin minifutbol üzrə dünya çempionu olan Azərbaycan millisi ilə görüşü barədə ayrıca yazı da yer alır. Materialda qəbul zamanı səsləndirilən fikirlər, idmançıların tarixi nailiyyəti və ölkəmizin minifutbol sahəsində yüksəlişi geniş şəkildə təsvir edilir.
Jurnalda Bakı Şəhər Halqası Əməliyyat Şirkətinin Milli Mətbuat katibi Arzu Hüseynovanın III MDB Oyunları ilə bağlı geniş müsahibəsi də oxuculara təqdim edilib. 
Oxucular bu sayda həmçinin, AİJA-nın 30 illik yubileyinə və Azərbaycan komandasının ilk dəfə iştirak etdiyi Deflimpiya Oyunlarına həsr olunmuş yazı ilə də tanış ola bilərlər. 
Jurnalda “Kəndlərimiz və idman” rubrikasında Masallı rayonunda yerləşən bir kəndin idman həyatını əks etdirən maraqlı yazı oxuculara təqdim edilir. Burada kənd gənclərinin idman sevgisi, yerli infrastrukturun inkişafı və Tüklə Voleybol Liqası barədə məlumatlar yer alır.
Jurnalın təsisçisi və baş redaktoru Ramin Allahverdiyevin “Yubileylər ilini uğurla başa vurduq” adlı məqaləsində isə il ərzində reallaşan tədbirlər, görülən işlər və qarşıdakı planlar haqqında məlumatlar verilir.
Oxucular bu buraxılışda həmçinin, “Təhsil” Respublika İdman Mərkəzinin güləş bölməsinin məşqçiləri Əlisa Abbasov və Hüseyn Nəsirovun yetirmələrinin son uğurları, eləcə də yeniyetmə boksçu Yusif Ağakişiyev haqqında hazırlanmış dosye ilə də tanış ola biləcəklər.
Zəfər buraxılışının arxa üz qabığında 2026-cı il FIFA Dünya Çempionatının keçiriləcəyi stadionlar, onların təsvirləri və turnirin ev sahibləri – Kanada, ABŞ və Meksikanın rəsmi atributları yer alıb.