Aprelin 11-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşkilatçılığı ilə İmişli rayonunda "Yerli icra hakimiyyəti orqanları ilə kütləvi informasiya vasitələri arasında əməkdaşlığın genişləndirilməsi” mövzusunda regional konfrans keçirilib. Konfransdan əvvəl tədbir iştirakçıları İmişli rayonunda ümummilli lider Heydər Əliyevin abidəsini ziyarət edərək, önünə gül dəstələri qoyublar. Sonra rayonda müasir memarlıq üslubunda inşa edilmiş Heydər Əliyev Mərkəzi ilə tanışlıq olub. Mərkəzin konfrans zalında keçirilən tədbirdə İmişli rayon ictimaiyyəti, yerli media oraqanları, vətəndaş cəmiyyəti institutlarının təmsilçiləri, həmçinin ümumrespublika yayımlı KİV-lərin rəhbərləri iştirak ediblər. Konfransı açıq elan edən İmişli Rayon İcra Hakimiyyətinin başçısı Vilyam Hacıyev əvvəlcə tədbirin mühüm əhəmiyyət kəsb etdiyini diqqətə çatdırıb. Rayonda gedən abadlıq-quruculuq işləri barədə danışan V.Hacıyev deyib: "Bu gün İmişlidə abadlıq-quruculuq işləri geniş vüsət alıb. Rayonumuz illik xərclərini artıq öz büdcəsi hesabına ödəyir və mərkəzi büdcədən dotasiya almır. Məlumat üçün bildirim ki, rayonun büdcəsi 25 milyon manatdan artıqdır”. İcra başçısı təhsil, səhiyyə, mədəniyyət sahələrində əldə olunan uğurlardan da danışıb. "Sənaye, kənd təsərrüfatı sahəsində də böyük nailiyyətlər əldə olunub. İşsizlik problemi, demək olar ki, tam həllini tapıb”, - deyə o əlavə edib. Vilyam Hacıyev media ilə qarşılıqlı əməkdaşlığa da mühüm önəm verdiklərini vurğulayıb.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli bu formatda konfransın media ilə yerli icra hakimiyyəti orqanları arasında əməkdaşlığın inkişafına böyük töhfə verdiyini qeyd edib. "Bundan öncə də bu qəbildən olan tədbirlər Bakının müxtəlif rayonlarında, regionlarda keçirilib. Əsas nəticə isə odur ki, media ilə yerli icra hakimiyyəti orqanları arasında qarşılıqlı əməkdaşlıq dərinləşir, inkişaf edir”, - deyə o bildirib. Vüqar Səfərli Azərbaycanda medianın inkişaf tarixi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması və fəaliyyəti barədə də iştirakşılara genış məlumat verib: "Azərbyacn Respublikasının Prezidenti cənab İlham Əliyevin müvafiq fərmanı ilə Kütləvi İnformasiya Vasitələrinin İnkişafına Dövlət Dəstəyi Fondunun yaradılması mediaya ən yüksək səviyyədə göstərilən dövlər qayğısının növbəti təzahürü oldu. Bu gün KİV-in inkişafında Fond vacib rol oynayır”
Azərbaycan Mətbuat Şurasının sədri Əflatun Amaşov da İmişlidə son illərdə dinamik inkişaf müşahidə oldunduğunu diqqətə çatdırıb. O, cəmiyyətin həyatında medianın oynadığı rol barədə də iştirakçılara geniş məlumat verib. Azərbaycan Milli Televiziya və Radio Şurasının sədi Nuşirəvan Məhərrəmli isə qeyd edib ki, bu gün həyatın hər hansı sahəsini mediasız təsəvvür etmək mümkün deyil. O, İmişlidə gedən abadlıq-quruculuq işlərinin mediada işıqlandırılması ilə bağlı fikirlərini iştirakçılarla bölüşüb.
"İki sahil” qəzetinin baş redaktoru Vüqar Rəhimzadə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşkilatçılığı ilə keçirilən bu səpkili tədbirlərin mühüm önəm kəsb etdiyini deyib. O, Azərbaycanda digər sahələr kimi, medianın da sürətli inkişaf yolunda olduğunu qeyd edib. Sonra tədbir qarşılıqlı diskussiya şəklində davam etdirilib.
