Şüvüllə hündürlüyə tullanma üzrə ikiqat Olimpiya çempionu Yelena İsinbayeva ana olub. Bu barədə Rusiya Atletika Federasiyasının mətbuat xidməti açıqlama yayıb."Yelena İsinbayevanın qızı dünyaya gəlib. Uşağın boyu 53 santimetr, çəkisi isə 4 kiloya yaxındır. Yelena və uşaq hazırda özünü yaxşı hiss edir”, - deyə açıqlamada bildirilir.
Xatırladaq ki, Yelena İsinbayeva 2013-cu ildə Moskvada çempion olduqdan sonra ana olmaq üçün bir müddət karyerasına fasilə verəcəyini demişdi. 32 yaşlı idmançı analıq məzuniyyətindən sonra 2016-cı ildə Rio-de-Janeyroda keçiriləcək Olimpiya oyunlarında iştirak etməyi planlaşdırdığını da bildirmişdi.
Qeyd edək ki, Rusiyalı idmançı Afina-2004 və Pekin-2008 Yay Olimpiya Oyunlarının çempionudur.