U-17 dünya çempionatı: Bu gün daha 5 yunan-Roma güləşçimiz mübarizəyə başlayacaq

Gündəm

28.07.2026, 10:00

Bu gün Bakıda keçirilən 17 yaşadək güləşçilər arasında dünya çempionatında yunan-Roma güləşi üzrə növbəti yarış gününə start veriləcək.

Olimpnews.az xəbər verir ki, Milli Gimnastika Arenasında təşkil olunan çempionatda Azərbaycanın daha 5 yunan-Roma güləşçisi təsnifat mərhələsində xalçaya çıxacaq. Pəhləvanlarımız ilk görüşlərində növbəti mərhələyə vəsiqə qazanmağa çalışacaqlar.

45 kq çəki dərəcəsində çıxış edən Əli Cavadlı təsnifat mərhələsində Bolqarıstan təmsilçisi Oqnyan Burqazovla qarşılaşacaq. 51 kq-da Abdulrəhman Hüseynli Qazaxıstan güləşçisi Kuanişbek Janqajolla qüvvəsini sınayacaq.

60 kq çəki dərəcəsində Elmir Çərkəzovun rəqibi Qazaxıstan idmançısı Nurali Askar olacaq. 71 kq-da mübarizə aparacaq Nadir Həsənov isə ilk görüşündə Tacikistan təmsilçisi Mahdi Azizboyevlə üz-üzə gələcək.

92 kq çəki dərəcəsində yarışacaq Zöhrab Səfərov təsnifat mərhələsində Ukrayna güləşçisi Hlib Yevsieyevlə qarşılaşacaq.

Qeyd edək ki, U-17 dünya çempionatı Milli Gimnastika Arenasında keçirilir. Yarışda 60-dan çox ölkədən 700-ə yaxın yeniyetmə güləşçi iştirak edir. Azərbaycan mundialda 29 idmançı ilə təmsil olunur. Turnirin qarşıdakı günlərində digər çəki dərəcələri üzrə də qaliblər müəyyənləşəcək.