Azərbaycan Güləş Federasiyasnın (AGF) 1 saylı nümayəndəliyinin tərkibində fəaliyyət göstərən klublarda məşğul olan sərbəst və yunan-Roma güləşi üzrə 2000-2001-ci illər təvəllüdlü yeniyetmələr arasında təsnifat yarışları start götürüb. Dünən start götürən yarışın keçirilməsində əsas məqsəd yeniyetmələr arasında sərbəst və yunan-Roma güləşi idman növlərinin inkişafına və kütləviliyinə nail olmaq, 1 saylı nümayəndəliyin tərkibində fəaliyyət göstərən klublarda çalışan məşqçilərin işini qiymətləndirmək, ehtiyat qüvvələri və perspektivli güləşçiləri aşkarlamaqdır.
Beynəlxalq Güləş Federasiyasının (FİLA) qaydalarına əsasən keçirilən yarışda 2000-2001-ci illər təvəllüdlü idmançılar iştirak edirlər. Şəxsi xarakter daşıyan turnirdə idmançılar 10 çəki dərəcəsində mübarizə aparırlar.
Tofiq Bəhramov adına Respublika Stadionunun güləş zalında keçirilən yarışların ilk günündə sərbəst güləşçilər döşək üzərinə çıxıblar. Turnirin ikinci günündə isə, yunan-Roma güləşçiləri mübarizəyə başlayacaqlar. Yarışlara avqustun 15-də yekun vurulacaq. Qalib və mükafatçılar Azərbaycan Güləş Federasiyası tərəfindən medal, diplom və müxtəlif hədiyyələrlə təltif olunacaqlar.
jpeg-1736407840.jpeg)
