Milli Gimnastika Arenasında test-turniri xarakteri daşıyan gimnastika növləri üzrə birgə açıq Azərbaycan çempionatında ikinci günün yarışlarına yekun vurulub. Gərgin mübarizə şəraitində keçən bədii gimnastikanın fərdi çoxnövçülük yarışlarında qadınlar arasında Yana Kudryavtseva (Rusiya) birinci yerə layiq görülüb. Azərbaycan təmsilçiləri Marina Durunda ikinci, Gülsüm Şəfizadə isə üçüncü yeri tutub.
Bədii çoxnövçülük yarışlarının qalibi Rusiya komandası olub. İkinci yerə Fransa, üçüncü yerə isə Azərbaycan komandası çıxıb.
Aerobika qarışıq növ yarışlarda fəxri kürsünün birinci pilləsinə Rumıniya komandası yüksəlib. Azərbaycan komandası gümüş, Almaniya komandası isə bürünc medallara sahib olub.
Akrobatikanın çoxnövçülük üzrə qadınlar arasında keçirilmiş qrup yarışlarında Azərbaycan komandası qalib gəlib. İkinci yeri Almaniya təmsilçiləri tutublar.
Martın 6-dək davam edəcək açıq Azərbaycan çempionatına 22 ölkədən 133 idmançı iştirak edib.
