"Dünya çempionatına gedəndə mən bir ay idi ki, əsgər idim. Hazırda isə əsgərliyimin bitməsinə 1 ay qalıb. Bir Azərbaycan əsgəri olaraq qürur duyuram ki, ölkəmizə həm bir əsgər kimi, həm də idmançı kimi medal qazandırmışam".
Bu sözləri Bakı-2015 birinci Avropa Oyunlarında yunan-Roma güləşində qızıl medal qazanan və qələbəsi münasibətilə ölkə başçısı, Ali Baş Komandan İlham Əliyevə hərbi salam verən Azərbaycan idmançısı Rəsul Çunayev deyib.
Rəsul Çunayev həmin gün qələbə təəssüratlarını "olimpnews.az saytı” ilə bölüşüb: "Finalda qalib gəldiyim Macarıstan idmançısı ilə indiyədək 4 dəfə qarşılaşmışam, 2 dəfə mən qalib gəlmişəm, 2 dəfə də o. Rəqibim ötən dəfə Bakıda məndən üstün olmuşdu. Bu, mənim üçün revanş oldu. İlk hissədə 4 xal aldım. Sonra müdafiəyə çəkildim, çünki yarış qabağı xəstələnmişdim, nəfəsim çatmırdı. Öz vətənimizdə qızıl medalı başqa kiməsə vermək fikrində deyildim və buna da nail oldum. İlk görüşdə Moldovalı güləşçi ilə qarşılaşdım. O, bu il 23 yaşlılar arasında Avropa çempionu olmuşdu. Çox çətin görüş keçdi. Ondan sonra təcrübəli xorvat idmançı ilə qarşılaşdım. Onunla da indiyədək 4 dəfə qarşılaşmışdıq. onun üzərində də qələbə qazandım. Yarımfinalda isə bolqar idmançısına asanlıqla qələbə qazandım. Finalda da qalib gəldim". Avropa Oyunlarının qalibi ilk görüşdəki nisbətən zəif çıxışını da xəstəliyi ilə əlaqələndirib: "Dediyim kimi xəstə idim. Bu səbəbdən birinci görüş çətin keçdi. 6:0 irəlidə idim, amma fikirləşdim ki, 8:0 olmalıdır, hakim 2 xalımı vermədi. Bundan sonra müdafiəyə çəkildim. Çünki nəfəsimə qənaət etməli idim. Sonra isə xal verərək vaxtı keçirirdim ki, sonda qələbə qazanım. Buna da nail oldum". O, qələbəsini bundan əməyi olan bütün insanlara, başda ölkə başçısı olmaqla Azərbaycan xalqına həsr etdiyini deyib: "Başda cənab Prezident olmaqla bizim Azərbaycana ancaq qələbə yaraşır. Sevinirəm ki, Avropa Oyunlarında güləşçilər arasında ilk qızıl medalı ölkəmizə qazandırdım".
Qeyd edək ki, 71 kq çəki dərəcəsində mübarizə aparan Rəsul Çunayev çempionluq adı uğrunda mübarizədə Macarıstan idmançısı Balint Korpasini məğlub edərək qızıl medala layiq görülüb.
jpeg-1736407840.jpeg)
