Birinci Avropa Oyunlarının yarışları böyük maraqla izlənilir. Milli Gimnastika Arenasında keçirilən gimnastikası yarışları zamanı bunun şahidi olduq. Maraqlıdır ki, yarışları izləyən yerli azarkeşlərlə yanaşı, əcnəbi azarkeşlər də azlıq təşkil etmir. Onlardan bir neçəsi ilə söhbətləşdik.
«Xalqımızı qələbə münasibətilə təbrik edirəm»
Gülzaman Quliyeva, tibb işçisi:
- Avropa Oyunları bizim üçün dünyaya açılan bir pəncərədir. Bu Oyunların təşkilindən sonra bütün dünya bizi tanıyacaq. Gimnastika yarışlarını izləməyə gəlmişəm. Bütün idmançılarımıza azarkeşlik edirəm və xalqımızı qələbə münasibətilə təbrik edirəm.
«Həmin anda qürürverici anlar yaşadıq»
Rza Xəlilli, tələbə:
- Avropa Oyunlarına dövlətimiz tərəfindən verilən dəyər hamımızı sevindirdi. Açılış mərasimi mükəmməl idi. Həmin anda qürurverici anlar yaşadıq. Gimnastika və su idman növləri üzrə yarışlar biletlər əldə etmişəm. Hər bir kəsi Avropa Oyunlarında yarışları izləməyə çağırıram.
«Azərbaycan komandasına azarkeşlik edirəm»
Lora Vilinqans, kanadalı turist:
- Avropa Oyunları çox gözəl təşkil olunub. Azərbaycanda maraqlı gün keçiririk. Bakıda gəzməli yerlər çoxdur. İki gündür ki, gimnastika və su polosu yarışlarını böyük maraqla izləyirəm. Müxtəlif idman növləri də mənim marağımdadır. Yarışlara yalnız Avropa ölkələri qatıldığından Azərbaycan komandasına azarkeşlik edirəm.
«Yay istirahətini idman yarışlarını izləməklə keçirmək insana xüsusi zövq verir»
Federiko Urban, italiyalı turist:
- Yarışlarda İtaliya komandasını dəstəkləyirəm. Avropa Oyunları ən yüksək səviyyədə təşkil olunub. Yay istirahətini idman yarışlarını izləməklə keçirmək insana xüsusi zövq verir. Yarışların təşkilatçılığına söz ola bilməz. Avropa Oyunlarında yerli komandamıza azarkeşlik edirəm.
