Azərbaycan Gimnastika Federasiyasında kadr dəyişikliyi olub və Pavlo Netreba kişi idman gimnastikası üzrə yığma komandasının baş məşqçisi təyin edilib.
Qeyd edək ki, 2014-cü ildən Azərbaycan yığma komandasının məşqçi heyətində fəaliyyət göstərən ukraynalı mütəxəssis Pavlo Netreba Oleq Stepko və Petro Paxnyukun şəxsi məşqçisidir. Sevindirici haldır ki, onun yetirmələri həmyerlimiz Eldar Səfərovla birgə Bakı-2015 I Avropa Oyunlarında komanda hesabında bürünc medala layiq görülüblər. Oleq Stepko isə bu yarışlarda şəxsi hesabına daha 4 -1 qızıl, 2 gümüş və 1 bürünc medal əlavə edib.
Pavlo Netrebanın rəhbərlik etdiyi kişi idman gimnastikası üzrə yığma komanda hazırda oktyabrın 25-dən noyabrın 1-dək Qlazqo şəhərində (Böyük Britaniya) keçiriləcək dünya çempionatına hazırlaşır. Bu yarışda həm də Rio-2016 Yay Olimpiya Oyunlarına lisenziya sahibləri müəyyənləşəcək.
