Dekabrın 11-də aerobika gimnastikası üzrə Azərbaycan birinciliyi keçiriləcək. Milli Gimnastika Arenasının köməkçi zalında bu növ üzrə keçiriləcək yarışlarda ölkə gimnastları ilk dəfə qüvvələrini sınayacaqlar.
Yarışlarda "Ocaq Sport İdman Klubu” nu təmsil edən 30-dan artıq gimnast iştirak edəcək. Turnirdə 6-8 yaş arasında oğlan və qızlar fərdi proqramda, həmçinin qarışıq cütlük və üçlüklərdə qüvvələrini sınayacaqlar. 9-11 yaşlı qızlar fərdi proqram, üçlük və qrup üzrə öz bacarıqlarını nümayiş etdirəcəklər. Tamaşaçılar həm də 12-14 yaşlı yeniyetmə idmançıların fərdi çıxışlarının da şahidi olacaqlar.
