Avropa çempionatının ilk günündə 3 medal

Dünən Bolqarıstanın Ruse şəhərində güləş üzrə U-23 Avropa çempionatı start götürüb.

İlk yarış günündə 59 kq, 71 kq, 80 kq və 98 kq çəki dərəcəsində yunan-Roma güləşçiləri mübarizə aparıblar və pəhləvanlarımız günü 3 - 1 gümüş və 2 bürünc medalla başa vurublar.

Murad Məmmədov (59 kq) gümüş, Ruhin Mikayılov (71 kq) və Elton Vəzirzadə (80 kq) bürünc medala sahib olub.

59 kq-da çempionatda iştirak edən Murad Məmmədov mübarizəyə 1/8 finaldan başlayıb və inamla güləşərək finala yüksəlib. Finala gedən yolda güləşçimiz ardıcıl olaraq Slovakiyadan Zoltan Levai, İsraildən Andrey Tsaryuk, yarımfinalda isə Türkiyə təmsilçisi Şerif Yakup Kılıçdan üstün olub. Son görüşdə Rusiyadan Sergey Emelinə uduzan Murad çempionatın gümüş medalına yiyələnib.

71 kq çəkidə mübarizə aparan Ruhin Mikayılov ilk görüşündə Daniel Mattias Soini (İsveç), ardınca Vasileios Myxakis (Yunanıstan) üzərində inamlı qələbə qazanıb. Yarımfinalda Xorvatiya təmsilçisi Antonio Kamenjaseviclə gərgin keçən görüşü uduzan güləşçimiz bürünc medal uğrunda görüşə çıxıb. Macarıstan güləşçisi Pal Krisztian Kottesi üstələyən Ruhin çempionatın bürünc medalını qazanıb.

80 kq-da yarışan Elton Vəzirzadə ilk görüşündə Türkiyə təmsilçisi Burhan Akbudaka məğlub olub. Rəqibin finala yüksəlməsi ilə təsəlliverici görüşə vəsiqə alan güləşçimiz Latviyadan Ceslavs Bestenisdən üstün olub. Bu qələbə Eltona bürünc medal uğrunda görüşə haqq qazandırıb. Həlledici görüşdə Macarıstan təmsilçisi Zoltan Keriyə də qalib gələn güləşçimiz çempionatın bürünc medalını qazanıb.

Mübarizəyə 1/16 final mərhələsindən qoşulan 98 kq-da təmsilçimiz Orxan Nuriyev ardıcıl olaraq Matti Elias Kuosmanen (Finlandiya) və Romas Fridrikası (Litva) yarışdan kənarlaşdırıb. 1/4 finalda Gürcüstan təmsilçisi Kukuri Kırtsxaila ilə gərgin keçən görüş isə güləşçimiz üçün uğurlu alınmayıb. Rəqibin finala yüksəlməsi ilə Orxan Polşa təmsilçisi Aleksander Kroczakla təsəlliverici görüşə çıxıb. Görüşü qələbə ilə başa vuran təmsilçimiz bürünc medal uğrunda həlledici görüşə haqq qazanıb. Rusiyadan Musa Evloevə uduzan Orxan Nuriyev çempionatı 5-ci sırada tamamlayıb.

İkinci yarış günündə 66 kq, 75 kq, 85 kq və 130 kq çəkidə yunan-Roma güləşçiləri yarışırlar.

U-23 Avropa çempionatı aprelin 3-də başa çatacaq.