Mayın 20-21-də Heydər Əliyev adına İdman-Konsert Kompleksində keçirilən akrobatika gimnastikası üzrə Azərbaycan və Bakı birinciliyinə yekun vurulub.
Yarışlarda "Ocaq Sport” Klubu, Bakı Gimnastika Məktəbi, "Neftçi” Idman Klubu və Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbini təmsil edən 67 akrobat medal uğrunda yarışıb. İki gün davam edən yarışlarda kişi və qadın gimnastlar müxtəlif yaş qruplarında qüvvələrini sınayıblar.
Kişi cütlüklər arasında böyük yaş kateqoriyasında (2002-2010-cu il təvəllüdlü) qalib adını M.Əkbərov/S.Cəfərov cütlüyü qazanıb. Qarışıq cütlüklər arasında yuniorlar yaş kateqoriyası üzrə (1997-2005) birinci yerə N.Cabbarlı/A.Rəhimov cütlüyü layiq görülüb. Kiçiklərin yaş kateqoriyasında qızıl medala F.Səttarov/N.Qasımova cütlüyü (2002-2010-cu il təvəllüdlü) sahib olub.
Qadın qrupları arasında yuniorlar yaş kateqoriyasında yarışlarda A.Əhmədova, N.Fərmanova və L.Bəşirova fəxri kürsünün ən yüksək pilləsində yer alıblar.
Uşaqların yaş kateqoriyasında birinci yeri S.Əsgərzadə/D.Zakirova/M.Beydiyeva üçlüyü tutub. Kiçiklər arasında isə E.Hüseynova/F.Nəzərova/ A.Məlikzadə üçlüyü güclü olub. Yuniyorlar arasında kişi cütlüklərin yarışlarında çempion adını isəS.Babayev/B.İbrahimov cütlüyü qazanıb.
L.Zeynalzadə/R.Zakirova qadın cütlüyü uşaqların yaş kateqoriyasında fəxri kürsünün ən yüksək pilləsində yer alıb. Kiçiklərin yaş kateqoriyasında kişi qrupları arasında yarışlarda yalnız E.Nuxov, Q.Hüseynov və R.Əzizov üçlüyü çıxış edib.
