Noyabrın 18-19-da Mingəçevir şəhərindəki "Kür” Olimpiya Tədris-İdman Mərkəzində bədii gimnastika üzrə 23-cü Azərbaycan birinciliyi və 3-cü bölgələrarası kubok yarışları keçirildi.
"Olimpnews.az” xəbər verir ki, iki gün davam edən yarışlarda balacalar (2006-2008), yeniyetmələr (2004-2005) və gənclər (2001-2003) yaş kateqoriyası üzrə 103 gimnast, həmçinin 9 qrup komandası iştirak etdi. Yarışda "Ocaq Sport” idman klubunun, Respublika Kompleks İdman Məktəbinin, Bakı Gimnastika Məktəbinin, Sərhədçi İdman Olimpiya Mərkəzinin, Daxili İşlər Nazirliyinin idman cəmiyyətinin, "Gömrükçü” idman klubunun, "Təhsil” Respublika İdman Mərkəzinin Sumqayıt filialının, "Zirvə” klubunun, eləcə də Gəncə, Qusar, İsmayıllı və Kürdəmirin gimnastları qüvvələrini sınadılar.
Yarışda əvvəlcə gimnastlar fərdi proqramda öz bacarıqlarını nümayiş etdirdilər. Balaca gimnastlar alətsiz, ip, halqada, yeniyetmələr halqa, top, gürzlər və lentlərdə, gənclər ip, halqa, top və gürzlərdə mübarizə apardılar.
Ölkə birinciliyində fərdi çoxnövçülük üzrə yarışlarda 2008-ci il təvəllüdlü gimnastların mübarizəsində Nərminə Bayramova qızıl medal qazanıb. 2007-ci il təvəllüdlü gimnastlar arasında Fatimə Məmmədzadə fərqlənib. Təvəllüdü 2006-cı il olan atletlərin mübarizəsində Fidan Yusifzadə fəxri kürsünün ən yüksək pilləsinə qalxdı.
Bölgələrarası kubok yarışlarında isə 2008-ci il təvəllüdlü gimnastlar arasında Aişə Rəcəbli çempion adını qazanıb. 2007-ci il təvəllüdlülər arasında Nənəbacı Şəfiyeva, 10 yaşlı gimnastlar arasında isə Leyli Ağazadə qızıl medala sahib oldular.
23-cü Azərbaycan birinciliyində yeniyetmə gimnastların gürzlərlə fərdi yarışlarında Arzu Cəlilova, gənclər arasında isə Zöhrə Ağamirova qızıl medala layiq görüldü. Yeniyetmələrdən Nərminə Səmədova yarışı ikinci, Nəzrin Cəfərzadə isə üçüncü pillədə başa vurdular. Gənclər arasında Dərya Farşbafşəhriyari ikinci, Qazaxıstan təmsilçisi Amina Rüstəmova isə üçüncü oldular.
Azərbaycan birinciliyi çərçivəsində qrup komandalarının yarışında qızıl və gümüş medallara "OcaqSport" İdman Klununun komandası sahib oldu. "Gömrükçü" İdman Klubunun təmsilçiləri isə bürün medalla kifayətləndilər.
Birincilikdə yerli gimnastlarımızla yanaşı, Ukrayna və Qazaxıstandan qonaq gəlmiş idmançılar da çıxış edirdilər.
Səadət Hakıyeva
