Bədii gimnastika üzrə 23-cü Bakı çempionatı və birinciliyi, aerobika gimnastikası üzrə isə 2-ci Azərbaycan çempionatı və Bakı birinciliyinə dekabrın 1-də start verilib.
"Olimpnews.az” xəbər verir ki, Milli Gimnastika Arenasında (MGA) keçirilən yarışlarda Bakı Gimnastika Məktəbi, "Ocaq Sport”, "Gömrükçü”, "Sərhədçi”, "Spartak” idman klublarını, DİN-nin İdman Cəmiyyəti, Respublika Kompleks İdman Məktəbi və Şağan Olimpiya İdman Kompleksini təmsil edən 141 gimnast qüvvəsini sınayır.
Yarışların ilk günü bədii gimnastika üzrə balacalar (alətsiz, halqa, top), yeniyetmələr (alətsiz, ip, top, gürzlər) və gənclər (ip, halqa, top, gürzlər) medallar uğrunda mübarizə aparıblar. Sonra balacalar yaş kateqoriyası üzrə 8 qrup hərəkətləri komandasının alətsiz və topla çıxışları nümayiş olunub.
Yarışların ikinci günü bədii gimnastlarla yanaşı, aerobika gimnastikasının təmsilçiləri də bacarıqlarını sınayıblar. Bu gün fərdi və üçlük proqramı üzrə uşaqlar (7-8 yaş), balacalar (9-11 yaş), yeniyetmələr (12-14 yaş), gənclər (15-17 yaş), böyüklər (18 yaş və daha böyük) yaş kateqoriyası üzrə idmançılar medallar uğrunda mübarizə aparırlar.
Balacalar arasında fərdi yarışlarda "OcaqSport” İdman Klubunun təmsilçiləri xüsusilə fərqlənbiblər. Belə ki, klubun gimnastları 2006-cı il təvəllüdlü idmançıların yarışında mükafatalayiq yerləri özləri üçün təmin ediblər. Zəhra Paşayeva qızıl, Fidan Yusifzadə gümüş, Kamilla Əliyeva isə bürünc medala layiq görülüb. Adıçəkilən klubun təmsilçiləri 2007-ci il təvəllüdlü gimnastların yarışında da fərqləniblər. Fatimə Məmmədzadə və Mədinə Dəmirova I və II yerləri bölüşdürüblər. 3-cü yeri Bakı Gimnastika Məktəbinin yetirməsi Nuray Həsənzadə tutub. "OcaqSport” klubunun yetirmələri Nərminə Bayramova və Məryəm Hüseynova 2008-ci il təvəllüdlülərin mübarizəsində ilk ikilikdə qərarlaşıblar. 3-cü yerə Respublika Kompleks İdman Məktəbinin gimnastı Ayan Əliyeva layiq görülüb.
Turnir boyunca təqdim olunan fləşmoblar, müsabiqələr tamaşaçılara yüksək əhval-ruhiyyə bəxş edir. Həmçinin, yarışın facebook səhifəsində aktiv istifadəçilər tərəfindən paylaşılan şəkillər yarış zalında quraşdırılmış böyük monitorda görüntülənir. Təbii ki, bu da öz növbəsində həm tamaşaçılara, həm yarış iştirakçılarına maraqlı anlar yaşadır.
Bədii gimnastika üzrə 23-cü Bakı çempionatı və birinciliyi, aerobika gimnastikası üzrə isə 2-ci Azərbaycan çempionatı və Bakı birinciliyinə dekabrın 2-də yekun vurulacaq.
