Bədii gimnastika üzrə 23-cü Bakı çempionatı və birinciliyi, aerobika gimnastikası üzrə isə 2-ci Azərbaycan çempionatı və Bakı birinciliyinə yekun vurulub.
"Olimpnews.az" xəbər verir ki, Milli Gimnastika Arenasında (MGA) təşkil edilən yarışlarda Bakı Gimnastika Məktəbi, "Ocaq Sport”, "Gömrükçü”, "Sərhədçi”, "Spartak” idman klublarını, DİN-nin İdman Cəmiyyəti, Respublika Kompleks İdman Məktəbi və Şağan Olimpiya İdman Kompleksini təmsil edən 141 gimnast qüvvəsini sınayıb.
Yarışların ilk günü bədii gimnastika üzrə balacalar (alətsiz, halqa, top), yeniyetmələr (alətsiz, ip, top, gürzlər) və gənclər (ip, halqa, top, gürzlər) medallar uğrunda mübarizə aparıblar. Sonra balacalar yaş kateqoriyası üzrə 8 qrup hərəkətləri komandasının alətsiz və topla çıxışları nümayiş olunub.
Yarışların ikinci günü bədii gimnastlarla yanaşı, aerobika gimnastikasının təmsilçiləri də bacarıqlarını sınayıblar. Çoxnövçülük üzrə balacalar arasında fərdi yarışlarda "OcaqSport” İdman Klubunun təmsilçiləri xüsusilə fərqləniblər. Belə ki, klubun gimnastları 2006-cı il təvəllüdlü idmançıların yarışında mükafatalayiq yerləri özləri üçün təmin ediblər. Zəhra Paşayeva qızıl, Fidan Yusifzadə gümüş, Kamilla Əliyeva isə bürünc medala layiq görülüb. Adıçəkilən klubun təmsilçiləri 2007-ci il təvəllüdlü gimnastların yarışında da rəqiblırindən üstün olublar. Fatimə Məmmədzadə və Mədinə Dəmirova I və II yerləri bölüşdürüblər. 3-cü yeri Bakı Gimnastika Məktəbinin yetirməsi Nuray Həsənzadə tutub. Klubun yetirmələri Nərminə Bayramova və Məryəm Hüseynova 2008-ci il təvəllüdlülərin mübarizəsində ilk ikilikdə qərarlaşıblar. 3-cü yerə Respublika Kompleks İdman Məktəbinin gimnastı Ayan Əliyeva layiq görülüb.
Yeniyetmələrin yarışında Nərminə Səmədova ("OcaqSport”) fəxri kürsünün ən yüksək pilləsində yer alıb. 2-ci yeri Arzu Cəlilova ("OcaqSport”) tutub. BGM-nin yetriməsi Nəzrin Cəfərzadə isə bürünc mükafata layiq görülüb. Gənclər arasında çoxnövçülük üzrə fərdi yarışlarda mükafatalayiq yerləri Dərya Farşbafşəhriyari (BGM), Elizaveta Luzan və Aleksandra Qafitulina (hər ikisi "OcaqSport”) tutublar.
Ümumi komanda hesabında 1-ci yerə "OcaqSport” İdman Klubu layiq görülüb. BGM 2-ci, "Gömrükçü” isə 3-cü pillədə qərarlaşıb. Qrup hərəkətləri üzrə yarışlarda isə "Ocaq-1”, "Ocaq-2” və BGM-nin komandası fərqlənib.
Səadət Hakıyeva
