Məşqçilər üçün kurslar təşkil olunub

Məşqçilər üçün kurslar təşkil olunub



Beynəlxalq Olimpiya Komitəsi və Beynəlxalq Velosipedçilər İttifaqının dəstəyi, Azərbaycan Velosiped İdmanı Federasiyasının təşkilatçılığı ilə məşqçilər üçün 1-ci dərəcəli texniki kurslar təşkil olunub. Milli Olimpiya Komitəsinin təşəbbüsü ilə həyata keçirilən bir həftəlik kurslar Respublika Velotrekində baş tutub.

Velosiped məşqçiləri üçün həyata keçirilən layihənin əsas məqsədi beynəlxalq dərəcəli velosiped məşqçilərinin yetişdirilməsi, nəzəri və praktiki biliklərinin genişləndirilməsidir. Məşğələlər Beynəlxalq Velosipedçilər İttifaqının müvafiq proqram üzrə beynəlxalq dərəcəli mühazirəçisi Jan Jak Anri tərəfindən keçirilir. Layihədə ümumilikdə 20 məşqçi iştirak edib.  Kursların yekununda iştirakçılara beynəlxalq dərəcəli sertifikatlar təqdim olunub. 

Təlimin iştirakçıları arasında "Olimpiya Hərəkatı-2017” layihəsinin məşqçiləri də var. Milli Olimpiya Komitəsi, Gənclər və İdman Nazirliyi, Təhsil Nazirliyi, həmçinin Olimpiya Oyunlarının ümumdünya tərəfdaşı "Coca-Cola” şirkəti tərəfindən birgə həyata keçirilən "Olimpiya Hərəkatı” proqramının əsas məqsədi məktəblilər arasında atletika, velosiped idmanı, basketbol 3x3, voleybol 2x2 və badminton idman növləri üzrə yarışlar keçirməklə şagirdləri sağlam və aktiv həyat tərzinə cəlb etmək, həmçinin Olimpiya dəyərlərini təşviq etməkdən ibarətdir.