Azərbaycan Gimnastika Federasiyası beynəlxalq yarışlar mövsümünə start verib. Belə ki, Milli Gimnastika Arenasında (MGA) batut gimnastikası, ikili mini-batut və tamblinq üzrə Avropa çempionatı, eləcə də idman gimnastikası və bədii gimnastika üzrə Dünya kuboku yarışları keçiriləcək.
İdman gimnastikası üzrə Dünya kuboku yarışları martın 15-18-də təşkil ediləcək. Bakıda artıq 3-cü ildir ki, təşkil ediləcək bu yarışda 27 ölkədən 163 idmançı qüvvəsini sınayacaq. Kişi və qadın idman gimnastlar turnirin ilk iki günü təsnifat mərhələləri, son iki günü isə ayrı-ayrı alətlər üzrə finallarda medallar uğrunda mübarizə aparacaqlar.
Gimnastlarımız 2018-ci ildə Dünya kuboku yarışları ilə bərabər, aprelin 12-15-də batut gimnastikası, ikili mini-batut və tamblinq üzrə Avropa çempionatında iştirak edəcəklər. Bakının ev sahibliyi edəcəyi XXVI Avropa çempionatında böyüklər proqramında 25, gənclər proqramında isə 26 ölkənin iştirakı gözlənilir. Hər 3 növ üzrə idmançıların ümumi sayının 400-dən çox olacağı ehtimal olunur. Gimnastlar yarışda 4 növ - fərdi batut, sinxron batut, tamblinq və ikili mini-batut növündə yarışacaqlar.
Məlumat üçün bildirək ki, ölkəmizdə keçiriləcək Avropa çempionatı Yeniyetmələrin III Yay Olimpiya Oyunlarına və Minsk-2019 Avropa Oyunlarına lisenziya verir.
Aprelin 27-29-da isə ölkəmiz daha bir idman yarışına - bədii gimnastika üzrə Dünya kuboku AGF Trophy yarışlarına ev sahibliyi edəcək.
